A Xunta quere fomentar a compra de accións en empresas estratéxicas como Altri que deducirán no IRPF

O presidente da Xunta, Alfonso Rueda, destacou que na renda de 2024 xa serán de aplicación as últimas deducións fiscais autonómicas aprobadas e cifrou en 34 millóns de euros o aforro que, nesta campaña, suporán para o peto dos galegos as medidas de alivio fiscal que impulsa o seu Goberno.

No que se refire a as empresas, existen deducións por investimento en empresas agrarias, pola compra de accións ou participacións en entidades novas ou de recente creación, por investimentos realizados en entidades cotizadas no mercado alternativo bolsista, por donativos a centros de investigación de universidades galegas e dos promovidos ou participados pola Xunta.

Para seguir apoiando as empresas galegas, Rueda lembrou que na presente campaña habilitouse, ademais, unha nova dedución para os contribuíntes que adquiran accións ou participacións en empresas de especial interese público, social ou económico conforme a lei reguladora dos proxectos que utilizan recursos naturais de Galicia. Entre estas empresas están Altri, Cobre San Rafael ou as dúas planta de produción de hidróxeno.

A porcentaxe de dedución é do 20% e aplicarase sobre a base constituída polas cantidades investidas no exercicio, cunha base máxima total de 10.000 euros por entidade. Tamén os deportistas de alto nivel poden deducir as axudas e subvencións recibidas.

MEDIDAS DE ACCIÓN FISCAL

Na comparecencia de prensa posterior á reunión semanal do Executivo, que analizou un informe elaborado pola Consellería de Facenda e na semana na que se inicia a campaña da renda, o presidente defendeu que as medidas de alivio fiscal postas en marcha polo seu Executivo posibilitaron "un aforro de 128 millóns desde 2022".

Actualmente, as familias con dous fillos poden deducir 250 euros, un incentivo que ata 2023 tiñan as familias numerosas (250 euros as de categoría xeral e 400 euros as de especial), que se duplicou para as familias de tres fillos (500 euros). En total, son case 190.000 familias, entre numerosas e con dous fillos, as que resultan beneficiadas na súa declaración.

Unha cantidade increméntase noutros 250 euros por cada fillo a maiores (a partir de tres). Así mesmo, están vixentes deducións referidas ao nacemento ou adopción de fillos, ao coidado de fillos menores, ás persoas con discapacidade de 65 ou máis anos que precisen axuda de terceiros e ao acollemento familiar.

Abundando nas medidas de protección ás familias, na campaña da renda de 2024 os contribuíntes galegos terán unha mellora na dedución por acollemento familiar, de forma que se aplicarán sempre 300 euros con independencia da súa duración.

OUTRAS DEDUCIÓNS

No que respecta a deducións por vivenda para aluguer, poden acollerse os contribuíntes de idade igual ou inferior a 35 anos. Tamén se aplican para os investimentos en instalacións de climatización e/ou auga quente sanitaria que empreguen enerxías renovables na vivenda habitual, e para obras de mellora de eficiencia enerxética en edificios de vivendas ou en vivendas unifamiliares, así como polos gastos dirixidos ao uso de novas tecnoloxías nos fogares galegos. Así mesmo, establécense vantaxes fiscais para a rehabilitación de bens inmobles en centros históricos e para a adquisición ou rehabilitación de vivendas en aldeas modelo.

ASISTENCIA PRESENCIAL

A Axencia Tributaria de Galicia (Atriga) prestará asistencia presencial --con 36 efectivos e seis coordinadores que estarán presentes no sete plataformas da Axencia Estatal da Administración Tributaria--, telefónica e videoasistencia aos contribuíntes galegos durante a campaña da renda, que comeza este mércores 2 de abril.

Ata o 6 de maio a declaración só poderase presentar de maneira telemática, pero ese día comeza a atención telefónica do 'Plan Chamámoslle' para obter asistencia telefónica na confección da declaración. A partir do 2 de xuño dará comezo a atención presencial aos cidadáns que prefiran atender os seus deberes tributarios do IRPF deste xeito.