Protestas contra a ampliación das competencias das mutuas na xestión de baixas por dores músculo-esqueléticos: "Non máis abusos"

Delegados e delegadas da CIG mobilizáronse nas sete cidades galegas para rexeitar que as mutuas poidan xestionar as baixas por doenzas músculo-esqueléticas e para reclamar á Xunta que non subscriba este tipo de convenios que "facilitan os abusos das axencias de colaboración e profundan na privatización da sanidade pública". "Non máis abusos das mutuas, que non se lle outorguen máis competencias, queremos sanidade pública", expuxo o secretario xeral da CIG, Paulo Carril, no transcurso dunha concentración celebrada ante a Delegación da Xunta na Coruña entre berros de 'A nosa saúde non se toca'.

"Pretenden seguir descapitalizando a sanidade pública, ampliando as competencias das mutuas que xa son, neste momento, un instrumento que ataca e actúa contra a saúde das persoas traballadoras, tanto na prevención de riscos laborais como, especialmente, en toda a súa atención cando hai un accidente de traballo ou enfermidade profesional", denunciou. Carril explicou que un acordo asinado o 19 de setembro en Madrid polo Goberno central, UGT, CC.OO. e a patronal, pretende que as comunidades autónomas "convenien coas mutuas ampliar a atención das enfermidades músculo-esqueléticas". "Demandamos á Xunta que dunha vez dea o paso adiante de negarse a facer isto", esixiu.

Neste sentido, apuntou que nunha reunión co secretario de Estado da Seguridade Social e Pensións, Borja Suárez, expuxeron que era "absolutamente indecente que fagan esta invasión de competencias". "Non queremos máis abusos das mutuas que xa abusan suficiente e queremos sanidade pública, onde se debe dar o tratamento adecuado ás persoas traballadoras sexa a doenza que sexa", insistiu o secretario xeral da CIG. Por iso, do mesmo xeito que na cidade herculina leváronse a cabo mobilizacións, este mércores, nas sete principais cidades galegas: Santiago de Compostela, Ferrol, Lugo, Ourense, Pontevedra e Vigo.

Delegados e delegadas da CIG, nunha concentración ante a Delegación da Xunta na Coruña | Fonte: Europa Press