Nace unha nova empresa biotecnolóxica galega para o tratamento do cancro

Iteria Biopharma, con sede no Parque Empresarial de Touro, desenvolverá un primeiro programa para combater o cancro de próstata resistente a terapia de privación hormonal iniciado por GalChimia. Úndese así ao ecosistema biotecnolóxico de Galicia desde o Parque Empresarial de Touro (A Coruña), onde prevé crecer en capital e persoal a partir de 2025. A compañía inicia a súa andaina co desenvolvemento preclínico dun candidato para o tratamento do cancro de próstata que desenvolveu resistencia á terapia estándar de privación de andrógenos, tomando a substitución dos avances conseguidos por GalChimia no proxecto MAOPROST.

O capital de Iteria Biopharma está integrado por GalChimia, empresa galega de servizos para a industria farmacéutica liderada por Carme Pampín e Jacobo Cruces; Julio Castro, CEO e fundador da biotech Palobiofarma con sedes en Navarra e Barcelona; e Ramon Bosser, que ademais asume a posición de CEO na compañía, achegando máis de 28 anos de experiencia en programas de desenvolvemento de medicamentos en contornas farma e biotech.

O equipo promotor repite experiencia tras o éxito da súa anterior iniciativa, Origo Biopharma, outra biotech especializada, no seu caso, en descubrimento de fármacos órgano-restrinxidos para o tratamento da fibrosis intestinal e pulmonar. Tras alcanzar fases clínicas co seu candidato para a fibroestenosis asociada á enfermidade de Crohn e iniciar un segundo programa preclínico para o tratamento a fibrosis pulmonar idiopática baixo o liderado de Ramon Bosser como CEO, Origo foi adquirida en 2021 pola empresa belga Agomab Therapeutics, que continuou co desenvolvemento clínico de ambos os programas iniciados por Origo Biopharma.

"Así como ORIGO facía referencia á orixe dunha colaboración co reto de avanzar un primeiro programa de descubrimento de fármacos, ITERIA simboliza a nosa intención de afianzar este modelo de cooperación e repetir a experiencia impulsando un novo proxecto; o aprendido anteriormente permítenos agora arrincar cun núcleo consolidado e avanzar con axilidade neste sector tan competitivo", explica Carme Pampín.

Iteria Biopharma nace para xestionar os avances obtidos por GalChimia no proxecto MAOPROST, unha iniciativa que contou co respaldo financeiro da Administración Pública a través do programa Colaboración Público-Privada 2021 do Ministerio de Ciencia, Innovación e Universidades e a Axencia Estatal de Investigación, e cuxo obxectivo é o descubrimento e desenvolvemento de produtos terapéuticos para combater o cancro de próstata avanzado, aquel que é resistente á terapia de privación de andrógenos.