Arzúa organiza excursións para 'coñecer o noso país'
O Departamento de Cultura do concello recupera o programa de excursións 'Coñece o teu país' que volve despois de varios anos sen celebrarse por mor da pandemia. Ferrol, Sober, Bueu e Ribadavia serán os destinos do ciclo que se desenvolverá entre xuño e setembro.
Por Galicia Confidencial | Arzúa | 17/06/2022 | Actualizada ás 09:00
A iniciativa regresa, despois do parón por mor da pandemia, con catro novas visitas a diferentes lugares da xeografía galega ao longo dos meses estivais de xuño a setembro.
A primeira delas será o vindeiro sábado día 25 de xuño e terá como destino a cidade de Ferrol na que se realizará unha visita a Exponav, o museo de construción naval máis importante de Europa. A xornada completarase coa visita guiada á zona monumental pola tarde.
A segunda excursión, será o 30 de xullo e levará á veciñanza do Concello de Arzúa a Sober, na provincia de Lugo, para visitar diferentes igrexas románicas deste municipio da Ribeira Sacra e a Casa Reitoral de Gundivós reconvertida en centro de interpretación da olería.
As dúas restantes saídas serán o sábado 27 de agosto, día no que se visitará Bueu --na provincia de Pontevedra--, e o sábado 24 de setembro día que se coñecerá a localidade ourensá de Ribadavia.
Segundo se indica dende o Departamento de Cultura, todas as persoas interesadas en participar no programa deberán inscribirse, de balde, na Oficina de Cultura e Deportes, podendo anotar como máximo a un acompañante por cada solicitante. As prazas dispoñibles iranse cubrindo por orde de inscrición, sendo as mesmas limitadas.
Todas aquelas persoas que desexen apuntarse á primeira viaxe organizada para o vindeiro 25 de xuño a Ferrol, poden facelo a partir deste venres, 17 de xuño, entre as 8:30 e as 14:00 horas.
A Oficina de Cultura e Deportes está situada no edificio sociocultural María Mariño, na rúa Padre Pardo nº 33, no 1º andar (ao carón de Radio Arzúa).
