Pontevedra engalana as súas rúas e prazas con 5.000 plantas en flor

Pontevedra está a acometer nestes días unha plantación masiva de flores en diversas zonas verdes, prazas, rúas e rotondas para que a cidade reciba o verán cunha exaltación de cores.

Deste xeito, o Servizo Municipal de Parques e Xardíns sementou de chamativos arranxos florais espazos como a Praza de Barcelos, os xardíns de Marescot, os maceteiros de Benito Corbal e as glorietas de 12 de Novembro con Loureiro Crespo e a do entronque de Paseo de Colón coa Alameda e Raíña Vitoria.

Tal e como apunta o concelleiro de Desenvolvemento Sostible e Medio Natural, Iván Puentes, "con esta intervención pretendemos engalanar Pontevedra cunha plantación de 5.000 flores e plantas". Nesta intervención para enfeitar os xardíns participaron varias empresas da contorna, así como a brigada municipal de Parques e Xardíns, cun investimento global que supera os 12.000 euros.

Os traballos seguirán adiante noutros puntos da cidade.