O Parlamento galego aproba o impulso de accións de emprendemento para afrontar o reto demográfico

O Parlamento de Galicia aprobou unha proposición non de lei, impulsada polo grupo popular, que insta á Xunta a continuar impulsando accións de emprendemento como unha forma de afrontar o reto demográfico e fixar poboación no territorio, ademais de dirixirse ao Goberno central para reclamarlle os fondos necesarios relativos ao financiamento. Esta proposición, votada este xoves na Comisión de Sanidade do Parlamento, foi aprobada cos votos a favor de todos os grupos a excepción do nacionalista, que se abstivo.

Os populares defenderon que unha das mellores fórmulas para facer fronte ao reto demográfico é traballar a favor do colectivo autónomo, que en Galicia ten un peso específico "moi relevante". Así lembrou o compromiso electoral do presidente da Xunta, Alfonso Rueda, dun paquete de axudas que superará os 40 millóns de euros e que englobará a cota cero, o programa 'nova oportunidade' e axudas para conciliación, entre outras. Tamén citaron os 15 polos de emprendemento de Galicia, onde "se identifican as necesidades e oportunidades para emprender que presenta cada un dos territorios". Todo isto, comentaron, axuda tamén a fixar poboación no rural.

OPOSICIÓN

Todos os grupos da oposición coincidiron en sinalar que, para fixar poboación no rural, a este tipo de medidas hai que engadir a dispoñibilidade de servizos públicos como o sanitario ou o educativo. "Hai dúas razóns polas que a xente non queda a vivir no rural: a falta de oportunidades laborais, e aí efectivamente o traballo autónomo pode ser unha saída, e que non se pode desenvolver un proxecto de vida digno", sinalou a nacionalista Olalla Rodil, que instou a "garantir uns servizos de benestar próximos e de calidade".

Armando Ojea, pola súa banda, engadiu o problema da falta de infraestruturas e da fenda dixital nestes lugares, polo que demandou a creación de servizos dixitais; mentres que a socialista Carmen Dacosta, de acordo con todo o citado, animou tamén a avanzar na simplificación administrativa, sobre todo en canto ás subvencións, e a mellorar a colaboración público-privada.

Un ancián no rural galego | Fonte: Carlos Castro - Arquivo