Sindicatos ven "disposición" na Xunta para negociar un acordo que manteña o emprego na educación concertada
Concentraranse coa patronal e ANPAs este mércores ante Educación contra o peche de unidades.
Por E.P. | Santiago de Compostela | 28/06/2022 | Actualizada ás 20:18
CC.OO. e UGT reuníronse este martes con responsables da Consellería de Cultura, Educación, FP e Universidades e afirman que hai "disposición" para convocar, en próximas datas, unha reunión para negociar un acordo de mantemento de emprego en centros concertados.
Segundo informan as organizacións, mantiveron un encontro co director xeral de Centros e Recursos Humanos, Jesús Manuel Álvarez Bértolo, e a subdirectora xeral de Centros, Susana Castro. Este mércores, acudirá á reunión a CIG.
As organizacións trasladáronlles a súa "preocupación pola perda de postos de traballo como consecuencia do peche de unidades" na concertada. Por iso, aínda que saúdan a vontade da Xunta a negociar un acordo, advirten de que están "en disposición de pasar a fases máis reivindicadoras" se os intereses dos traballadores "non fosen atendidos".
"UGT, CC.OO. e CIG volvemos demostrar eficacia e de que lado estamos na defensa dos intereses dos traballadores e traballadoras do ensino concertado", conclúen os sindicatos, nun comunicado.
Por outra banda, varias entidades do sector da educación concertada concentraranse este mércores ante a Consellería de Cultura, Educación, FP e Universidades, en Santiago de Compostela, despois dos peches de unidades notificados, "especialmente na etapa de Educación Infantil", para o curso 2022/23.
Así, a Federación Escuelas Católicas, que engloba a maioría destes centros, chama a participar nestas protestas que tamén secundan a Confederación Española de Centros de Educación (CECE), a Confederación Católica Galega de AMPAS (Congapa) e os sindicatos FSIE, SNEP e USO.
Escolas Católicas advirte que detrás desta medida de peche de unidades, tomada "de forma unilateral e sen negociación de ningún tipo", escóndense "unha vez máis políticas de aforro nun campo tan importante como é o educativo e nun momento no que se vai a implantar unha nova lei".
Ademais, a federación advirte que esta xestión "suporá tamén a perda de emprego para un número importante de docentes", mentres que outras comunidades negocian "medidas organizativas" que o eviten.
