Baltar: "Nunca se viu na democracia tanto desprezo polo local como o mostrado nos últimos tempos pola Moncloa"

O presidente da Deputación de Ourense, Manuel Baltar, participou na mañá deste martes en Madrid nas reunións da xunta de goberno e do Consello Territorial da Federación Española de Municipios e Provincias (FEMP), celebradas no Senado, desde onde volveu a pedir a convocatoria da Comisión Nacional da Administración Local (CNAL).

Considera que é necesario reunir este órgano para abordar o papel das entidades locais na repartición dos fondos europeos, o novo modelo de financiamento e a compensación polas perdas tras a anulación do imposto de plusvalía, entre outras

"Nunca se viu na democracia española tanto desprezo polo mundo local como o mostrado nos últimos tempos pola Moncloa", denunciou Baltar, quen reivindicou o traballo das administracións locais durante a pandemia e no actual contexto socioeconómico.

A convocatoria da CNAL foi, precisamente, un dos acordos alcanzados este martes nas reunións da FEMP. Ademais, os concellos e deputacións volveron demandar ao Goberno un fondo para compensar as perdas do transporte público en 2021 polo coronavirus, que sería independente das axudas aprobadas este sábado polo Executivo para combater a inflación.

Tamén solicitaron un Fondo Covid de 3.000 millóns e a supresión da aplicación das regras fiscais en 2023, entre outras cuestións.