Unha nova xornada de folga de Ryanair sáldase co atraso de sete voos en Santiago
Ata o momento, Ryanair despediu a nove tripulantes por facer efectivo o seu dereito a folga: un en Santiago; tres en Málaga; un en Xirona e catro en Barcelona.
Por E.P. | Santiago de Compostela | 20/07/2022 | Actualizada ás 19:40
A folga dos tripulantes de cabina de pasaxeiros (TCP) de Ryanair deixou ata as 19.00 horas deste mércores un total de seis voos cancelados e 214 atrasos nas operacións, sete deles en Santiago de Compostela, segundo informaron os sindicatos.
Catro das cancelacións producíronse en voos entre Barcelona El Prat e as cidades de Bruxelas e Milán (ida e volta) e as outras dúas en operacións entre Madrid e Palma de Mallorca (ida e volta).
No que se refire a os atrasos, o aeroporto máis afectado é o de Palma, con 30 demoras en saídas e 35 en chegadas. Séguenlle o do Prat, con 26 saídas e 26 chegadas, o de Málaga, con oito saídas e once chegadas, e o de Madrid, con cinco en saídas e 10 en chegadas. En Santiago de Compostela houbo catro atrasos en saídas e tres en chegadas. Todos os aeroportos nos que ten base a aerolínea sufriron algún atraso.
Ademais, os sindicatos informaron de que durante a xornada de hoxe tamén se produciu un novo despedimento dun tripulante por secundar a folga na base de Barcelona. Ata o momento, Ryanair despediu a nove tripulantes por facer efectivo o seu dereito a folga: un en Santiago; tres en Málaga; un en Xirona e catro en Barcelona.
ATRASOS POR FOLGAS E ESCASEZA DE PERSOAL EN EUROPA
Segundo comunicou este mércores a aerolínea, como resultado da situación nos aeroportos europeos, principalmente as folgas de control do tráfico aéreo (ATC) e a escaseza de persoal nos aeroportos, os voos están a experimentar algúns atrasos.
Ryanair pediu "sinceras" desculpas aos pasaxeiros que se verán afectados por estas complicacións, que "están totalmente fóra do control de Ryanair" e que, "lamentablemente, afectarán os pasaxeiros, así como aos seus plans de viaxe en toda Europa".
