Santiago vive unha noite sen incidencias cuns Fogos do Apóstolo de gran traca final
Asistencias por intoxicacións etílicas e unha colisión de tráfico en San Lázaro, entre as emerxencias atendidas durante a noite en Santiago.
Por E.P. | SANTIAGO DE COMPOSTELA | 25/07/2022 | Actualizada ás 12:55
Santiago de Compostela viviu as horas de entrada ao 25 de xullo, Día Nacional de Galicia, sen maiores incidencias fóra do normal dunha noite de festa na que os Fogos do Apóstolo se deixaron sentir por todos os recunchos da cidade.
E é que a forte e explosiva traca final do espectáculo, cunha importante parte sonora máis que visual, retumbou por toda a urbe desde os cinco puntos estratéxicos --Alameda, Fontiñas, Cidade da Cultura, Parque de Eugenio Granel e As Cancelas-- desde os que se lanzaron uns 2.500 quilos de material pirotécnico.
Cores, pólvora e grandes estalidos foron os tres fíos condutores dos 900 segundos --un cuarto de hora-- que, desde as 23,30 horas do domingo 24 de xullo, deron paso ao Día de Galicia deste segundo Ano Santo Xacobeo 2022.
A gran traca final, que fixo saltar a alarma dalgún que outro coche, era quizais aquela sorpresa que o venres deslizaba, pero non desvelaba, o responsable do espectáculo e de Pirotecnia Ricardo Caballer SA (Ricasa), Juan Manuel Humanes, quen xa prometera uns Fogos do Apóstolo "in crescendo".
Ao concluír o espectáculo, miles de persoas que se repartiron pola cidade para visualizalo --algo que non era posible antes de 2020, cando se concentraban na Praza do Obradoiro e na Alameda-- decidiron volver cara ao centro de Santiago para poder gozar dunhas festas que na noite do domingo ao luns tiveron como prato forte os concertos de Heredeiros da Crus, dentro da programación municipal, e de Tanxugueiras, dentro do Festigal.
NOITE SEN INCIDENCIAS DESTACADAS
A tirada dos Fogos do Apóstolo e as primeiras horas deste Día de Galicia de 2022 saldáronse sen "nada destacado" no boletín de incidencias, tal e como confirman a Europa Press fontes do 112. No entanto, si se rexistraron sucesos habituais destas festividades, como asistencias sanitarias por caídas e algunha intoxicación etílica.
Tamén unha hora despois de finalizar os lumes, sobre as 00,40 da mañá, houbo que intervir nunha colisión entre dous coches ocorrida na SC-20, á altura da rotonda de San Lázaro, que se saldou cunha persoa ferida dun brazo.
