Reaccións incendios: os concellos piden axudas para recuperarse da devastación

O pleno extraordinario de Caldas de Reis aprobou, por unanimidade dos tres grupos políticos con representación --PSOE, PP e BNG--, unha serie de medidas para a protección e rexeneración do monte Xiabre tras un incendio que arrasou 450 hectáreas. En total, son oito as medidas aprobadas polo Pleno, entre as que se insta á Xunta de Galicia e á Deputación de Pontevedra a que colaboren cos recursos necesarios para facilitar a recuperación e reforestación das hectáreas queimadas na parroquia de Saiar.

O alcalde de Caldas, Juan Manuel Rey, sinala que "é unha moción pioneira en Galicia porque, aínda non sendo unha competencia municipal", quérese "promover a cooperación interinstitucional, tamén co Concello de Vilagarcía e con todos os axentes afectados para evitar que os veciños das parroquias de Saiar, en Caldas, e de Cea, en Vilagarcía, sigan sufrindo estes incendios recorrentes, así como en calquera outra parroquia".

Tamén se recoñece e agradece o labor efectuado por todos os medios de extinción de diferentes administracións e agrupacións que se desprazaron ata a zona, e en particular á Policía Local e a Agrupación de Protección Civil de Caldas, que garantiron todos eles a seguridade da veciñanza da parroquia de Saiar ata lograr a extinción total do incendio.

Ademais, exponse a construción e acondicionamento de pozos de auga, con aproveitamento da auga das traídas e dos regachos de caudais continuos, para situar pozos de recarga de motobombas en zonas de difícil acceso, na área de maior afección de incendios, para o que se exporá a posibilidade de financiamento en colaboración coa Consellería de Medio Rural.

Igualmente, acordouse estudar a viabilidade para adaptar o aeródromo de Caldas, en Godos, como punto de recarga e abastecemento de combustible das avionetas e helicópteros, aproveitando as infraestruturas existentes e a proximidade do río Umia. Doutra banda, estudarase a posibilidade de introducir sistemas silvopastorís como mecanismo de control de vexetación.

Precisamente, o pasado mércores o alcalde de Vilagarcía de Arousa, Alberto Varela, anunciou que o concello implementará unha partida de 80.000 euros, que destina anualmente á conservación de montes, co obxectivo de recuperar o monte queimado de Xiabre.

Ademais, o rexedor e presidente da Federación Galega de Municipios e Provincias (Fegamp) pediu unha "rápida e eficaz" reacción á Xunta, que é a que ten competencias sobre os montes de Galicia, para paliar os danos sufridos, así como no tocante á reformulación de políticas forestais.

O representante da Comunidade de Cea-Castroagudín, Julián Abuín, informou de que os danos superan os 600.000 euros na zona de Vilagarcía ao perder unha importante extensión de árbores de plantación recente. Sinala que a maior parte das 350 hectáreas queimadas en Caldas estaban en mans de particulares, que perderon árbores cuxa madeira estaba en condicións de comercializarse, polo que o importe, aínda sen cuantificar, "será moi elevado".

Pola súa banda, o Concello de Verín convocou un pleno para este venres (12,30 horas) no que se vai a solicitar ao Goberno central a declaración de zona gravemente afectada por emerxencia de protección civil, a coñecida como zona catastrófica.

Precisamente, o incendio de Verín, iniciado na parroquia homónima, extinguiuse este xoves tras arrasar unhas 600 hectáreas, segundo estimación da Consellería de Medio Rural.

ANIMALISTAS

A entidade animalista Fundación Franz Weber pide á Xunta de Galicia que tome "medidas valentes" como a suspensión do inicio da caza maior en Ourense. Esta demanda xurdiu por mor dos incendios que afectaron a provincia.

Expón que por cada hectárea queimada prodúcense entre 10 e 15 baixas de animais moi diferentes, o que se traduce nun "mínimo de 10.000 vidas silvestres" por cada 1.000 hectáreas arrasadas. Estes cálculos foron tomados "seguindo as estimacións realizadas durante a vaga de incendios de Australia no 2020" e engadiron que son "aproximados e conservadores".

Así mesmo, recalcaron que para "evitar un desastre aínda maior" a suspensión desta actividade debería ser unha "decisión sinxela". Critican que "en Galicia é posible cazar en zonas adxacentes a terreos incendiados" e que a "lei só prohibe a caza tras lumes ata tres anos despois da súa extinción".

Nesta liña, fixeron referencia ás memorias do Ministerio de Agricultura e sinalaron que "detallan que case a metade dos incendios están vinculados á gandaría e a caza", é por ese motivo que a fundación engadiu que as administracións públicas deberían incidir sobre estas cuestións, "en lugar de seguir subvencionándoas".

Finalmente, fixeron referencia á crise climática e sostiveron que segundo os expertos nesa materia "a acción sostida do ser humano está a provocar cambios profundos no sector" e a "industria non reduce as súas emisións". Ante isto, avogan por reducir o impacto da gandaría e apostar pola alimentación de baixo custo.

BNG

O BNG instou A Xunta de Galicia a asignar máis medios "de forma inmediata" á loita contra incendios, vista a acumulación de focos "simultáneos" en Galicia nas últimas semanas.

A deputada nacionalista Noa Presas expresou a preocupación dos nacionalistas por uns lumes que queiman xa máis de 6.000 hectáreas, "unha grave situación que esixe ao Goberno galego actuar con responsabilidade e con inmediatez".

"Solicitamos unha vez máis da Xunta que active máis medios para a prevención, máis medios para a vixilancia e máis medios para a extinción, pois cada vez estamos a ver máis focos ao mesmo tempo e o que é clave é a rápida intervención, xa que se trata de incendios de nova xeración que son moi explosivos", reclamou.

Insisten ademais en que o BNG xa denunciara que a Administración galega "non tiña os deberes feitos en materia de prevención e de extinción de incendios, cos convenios cos concellos sen aprobar ata finais de xuño, o que implica que os traballos de roza e a constitución de brigadas, por exemplo, non poidan estar operativos ata entrado o mes de agosto".

A deputada nacionalista tamén avanzou que, "ante as últimas informacións aparecidas nos medios de comunicación que apuntan a que o incendio de Boborás podería orixinarse por faíscas na vía do tren", esixirán --"cando isto se acougue"-- unha investigación sobre se ADIF cumpre ou non coas súas obrigas de limpeza nos perímetros das vías.