Tanxugueiras actuará este sábado en Mallorca no marco da 'Nit de Foliada'
O concerto de Tanxugueiras irá precedido doutra actuación de orixe galega, o dúo formado por Laura Lamontagne & Picoamperio.
Por E.P. | Santiago de Compostela | 18/08/2022 | Actualizada ás 20:33
O festival La Lluna en Vers, en Mallorca, chega á súa recta final coa 'Nit de Foliada', que conta coas Tanxugueiras como cabeza de cartel no santuario de Consolación, en Sant Joan. Ás 21,30 horas soará o dúo galego formado por Laura LaMontagne & PicoAmperio, que une a tradición galaico-portuguesa coa electrónica. Ás 22,30 horas subirán ao escenario as Tanxugueiras, para ofrecer un espectáculo único no marco da súa xira Midas, segundo informou o Consell de Mallorca nunha nota de prensa.
O concerto de Tanxugueiras irá precedido doutra actuación de orixe galega, o dúo formado por Laura Lamontagne & Picoamperio, cunha proposta creada na plena intersección entre vangarda e tradición atlántica, en base á palabra literaria, de procedencia tanto escrita como oral. A proposta da 'Nit de Foliada' complétase cos dous talleres de folk e danzas galegas que ofrecerá Óscar Moreno antes do concerto, os días 18 e 19 de agosto, de acceso gratuíto para o público que teña entradas para o concerto.
O obxectivo destas sesións é ofrecer unha pequena introdución ao folclore galego e ao funcionamento do baile e do ritmo marcado polas pandereteiras e, a continuación, dar a coñecer as bases das danzas tradicionais galegas. Na sesión prepararase unha pequena coreografía tradicional para pór en práctica durante o mesmo concerto das Tanxugueiras.
Con esta 'Nit de Foliada', engadiron, La Lluna en Vers inicia a recta final e encara as últimas semanas. O festival de verán da Fundació Mallorca Literària arrincou o pasado 17 de xuño e ofreceu unha programación variada de cultura, música, teatro e literatura a diferentes lugares de Mallorca. Máis de 1.000 persoas gozaron ata agora das noites de cultura á luz da Lluna en Vers.
