O Parlamento galego volve reclamar ao Goberno medidas de apoio á industria electrointensiva

A reclamación ao Goberno de medidas de apoio para viabilizar o futuro da industria electrointensiva galega volveu concitar o consenso dos tres grupos con representación na Cámara galega, que votaron a favor dunha iniciativa do PP que apela ao diálogo coas comunidades e á aprobación dun PERTE como vías para garantir a actividade de plantas como a de Alcoa en San Cibrao.

A proposta foi aprobada no Parlamento de Galicia, que continuou este mércores coa sesión plenaria inaugural do curso político na que, tras a sesión de control ao presidente galego, Alfonso Rueda, se procedeu ao último debate das proposicións non de lei, que foron votadas a continuación.

Así, as únicas que saíron adiante foron as promovidas polo Grupo Popular, que tombou coa súa maioría abosoluta todas as iniciativas levadas polos grupos da oposición (BNG e PSdeG) ao pleno que arrincou o martes. Deste xeito, as iniciativas aprobadas están dirixidas a pedir á Xunta que reclame ao Goberno central que poña sobre a mesa medidas para a industria electrointensiva galega e para paliar os problemas na atención primaria da sanidade pública.

A primeira contou co apoio da oposición, pero non a segunda, coa que, a iniciativa do PP, a Cámara galega fixo seu o manifesto impulsado por Galicia e o País Vasco que solicitou o apoio de sete gobernos autónomicos para demandar medidas que favorezan a incorporación de profesionais á atención primaria. Así, o texto que saíu adiante grazas aos votos do grupo que ostenta a maioría absoluta no Pazo do Hórreo manifesta o seu apoio a este manifesto que expón a convocatoria de máis prazas MIR e a creación da especialidade de Medicina de Urxencias.

INDUSTRIA ELECTROINTENSIVA

Pola súa banda, a Cámara galega si que se uniu para reclamar medidas de apoio á industria electrointensiva. En concreto, solicita avances na tramitación do Perte para a descarbonización da industria electrointensiva a través da concreción de prazos e programas para "impulsar no marco dunha cogobernanza real e efectiva".

E é que a demanda de "diálogo" entre Goberno e comunidades para definir o futuro das electrointensivas é a liña principal deste acordo que tamén solicita que se exploren "mecanismos de colaboración análogos" ao subscrito pola Administración central coa compañía ArcelorMittal "co fin de apoiar o futuro da planta de Alcoa en San Cibrao".

INICIATIVAS REXEITADAS

Polo demais, todas as proposicións non de lei levadas ao pleno pola oposición quedaron rexeitadas polo 'non' do grupo maioritario. O BNG demandara a reprobación do director xeral da CRTVG, Alfonso Sánchez Izquierdo, por "violar" os dereitos fundamentais dos traballadores do ente público de forma "sistemática" e tamén que se configurase un pacto autonómico pola auga en aras de combater e prepararse ante episodios de seca.

Esta foi a última das iniciativas debatidas no bloque de proposicións non de lei. Durante a súa defensa, o deputado Luís Bará (BNG) incidiu en que Galicia debe "superar as políticas do século pasado" en materia de xestión da auga porque as secas deixan de ser "puntuais" para manterse no tempo, o que esixe "repensar" a gobernación deste recurso fundamental para a vida.

En resposta, o parlamentario popular José Manuel Balseiro xustificou o 'non' do seu grupo porque entenden que a proposta do BNG "chega tarde e, ademais, queda curta" en comparación co que leva a cabo "desde hai anos" o Goberno da Xunta en materia de xestión hídrica. Antes, Pablo Arangüena (PSdeG) acusara o PP de "continuar no negacionismo climático" e de apostar por medidas "moi prexudiciais" como o fracking ou "suspender" as limitacións ás emisións de CO2.

Pola súa banda, as iniciativas defendidas polo PSdeG durante este pleno querían solicitar o apoio da Cámara para pedir á Xunta que reclame ante a Comisión Europea que se reconsideren os plans para prohibir a pesca de arrastre e que aprobe un plan de medidas en materia agroforestal que sirva como vía para afrontar a problemática dos incendios forestais.

Hemiciclo galego. Declaración institucional no Parlamento de Galicia. | Fonte: Europa Press