O PPdeG reivindica que as súas políticas sociais fan "a vida máis doada aos galegos"

O presidente do PP galego e da Xunta, Alfonso Rueda, encabezará a delegación formada por unhas 50 persoas de representantes populares que acudirá este fin de semana á reunión interparlamentaria do partido estatal en Toledo e na cal reivindicará as políticas sociais do seu goberno fronte ao "medo" do Executivo de Pedro Sánchez. De feito, a secretaria xeral do PP galego, Pa Prado, encaixou nese "medo" o feito de que o xefe do Executivo central agora envía cada semana a Galicia "ao ministro de garda de insulto".

Rueda presidirá unha mesa na que reivindicará a política social da Xunta e terá ocasión de dar a coñecer o proxecto "estable, unido, próximo e solvente de Galicia" nunha fin de semana na que non faltarán outros protagonistas galegos como o deputado nacional Jaime de Olano --que abordará asuntos económicos--, o presidente de Novas Xeracións, Adrián Pardo --que falará da "España que vén"--, e outros cargos estatais como Miguel Tellado, á marxe do propio Alberto Núñez Feijóo, senador por designación autonómica e presidente do partido.

O PPdeG, como lembrou a súa secretaria xeral galega, conta con 13 senadores e dez deputados, aos que se sumarán outros representantes en Galicia. Precisamente, a comparecencia deste venres serviu para dar a coñecer ao deputado galego Moisés Rodríguez como nova ligazón de coordinación parlamentaria, que substitúe neste labor, de feito, á propia Paula Prado.

Durante a súa intervención, a dirixente explicou que a reunión interparlamentaria servirá para dar a coñecer as medidas de Galicia que fan "a vida máis doada aos galegos" e como o goberno do PP "está á altura" do que piden os cidadáns.

Entre outras políticas, reivindicará a gratuidade das escolas infantís desde o primeiro fillo, o Bono Activa Comercio --aprobado este xoves polo Consello--, e ter as taxas universitarias conxeladas e que sexan as máis baixas de todo o Estado ou as axudas con 107 millóns para familias no inicio do curso escolar.

Fronte a esta situación, viu un Goberno de Pedro Sánchez con "medo" e que agora envía a Galicia semanalmente ao "ministro de garda do insulto", cando antes Galicia parecía que "non existía no mapa".

Por iso, Paula Prado instou o Goberno de Sánchez a "escoitar" as necesidades da cidadanía e as "propostas e consellos dos que xestionaron situacións complicadas".