Unha ducia de detidos nunha operación contra o tráfico de heroína no Salnés
Por Europa Press / Redacción | SANTIAGO DE COMPOSTELA | 20/09/2022 | Actualizada ás 14:46
A operación contra o tráfico de heroína que se levou a cabo na mañá deste martes a Unidade de Droga e Crime Organizado (Udyco) de Pontevedra en municipios da comarca do Salnés sáldase polo momento cunha ducia de detidos, segundo confirmaron a Europa Press fontes policiais.
Así, os rexistros leváronse a cabo tanto en naves como en domicilios de Ribadumia, Meis, Meaño, Sanxenxo e Barro, na provincia de Pontevedra. A Policía Nacional confirmou que esta rede operaba con outra de Portugal, aínda que ata o momento se descoñece a forma de introdución da sustancia.
Fontes do Concello de Meis ratificaron que sobre as 9,00 horas viron un furgón policial nas inmediacións da casa consistorial. Tamén, fontes veciñais de Meaño confirmaron a presenza do helicóptero.
