Denuncian o "trastorno" que supón para as persoas maiores do rural acudir aos vacinódromos
"A Xunta establece con esta medida un copago aos maiores para poder recibir a vacina", denuncia o PSOE de Lugo.
Por Europa Press / Redacción | SANTIAGO DE COMPOSTELA | 05/10/2022 | Actualizada ás 14:11
O colectivo de xubilados e pensionistas da CIG denunciou as dificultades das persoas maiores de 80 anos que son convocadas para a dose de reforzo da vacina da Covid-19 para acudir aos centros de vacinación.
Segundo remarcan nun comunicado, trátase de persoas que, na súa maioría, xa non conducen e ás que lles supón "un trastorno enorme" trasladarse desde os seus lugares de residencia aos hospitais de referencia. É por iso que o colectivo reclama que se reforce persoal sanitario nos centros de saúde e que sexa nestes lugares, "máis próximos aos fogares", onde se inocule a dose de reforzo.
Como exemplo, sinalan que as persoas chamadas a vacinarse que viven do outro lado da ría de Vigo "teñen que coller primeiro un barco e despois un taxi para chegar ao hospital", algo que tachan de "despropósito". Engaden ademais que co inverno xa próximo, "non é de recibo facer que as persoas maiores que veñen do rural teñan que percorrer 30, 40 ou 50 quilómetros, facer colas de pé, ao frío e quizais baixo a choiva".
MOCIÓNS DO PSDEG EN MUNICIPIOS DE LUGO
Doutra banda, o secretario do PSdeG en Lugo, José Tomé Roca, anunciou que os socialistas presentarán mocións nos concellos da provincia para "esixir" á Xunta que vacine da Covid-19 nos centros de saúde ou PACs de referencia. Tal e como relatan nun comunicado, foi a Comisión Executiva a que o acordou para que o Goberno galego "rectifique unha medida que está a provocar gran malestar nos veciños".
"A diferenza do que se fixo en campañas de vacinación anteriores, na que os maiores acudiron ao centro de saúde e á PAC de referencia, agora obrígaselles a realizar, en gran parte dos casos, un longo desprazamento de ida e volta, de moitos quilómetros, para poder vacinarse", remarca Tomé. Así, os alcaldes convocarán plenos extraordinarios para tratar esta moción e os portavoces do partido nos concellos solicitarán a convocatoria dunha sesión extraordinaria para debatela.
A isto engaden que en gran parte das ocasións, os maiores necesitan ir acompañados dalgún familiar. Consideran ademais que a Xunta establece con esta medida un "copago" aos maiores para poder recibir a vacina, "xa que teñen que pagar do seu peto o custo do desprazamento, co que a gratuidade da prestación sanitaria deixa de ser tal".
Para o PSdeG, a decisión supón "un novo castigo da Administración autonómica ao noso rural porque afasta da veciñanza un servizo público básico, difilcultándolles gravemente o acceso a unha prestación á que teñen dereito de maneira totalmente gratuíta".
O SERGAS DEFENDE A VACINACIÓN EN MACRORECINTOS
Ante isto, o Sergas defendía en días pasados as citas en grandes recintos polo alivio de presión que supón para a Atención Primaria, por unha banda, e por outra, indicaba que foron os propios colectivos os que pediran acudir a recintos máis grandes, xa que é máis fácil aparcar e hai un servizo de axuda para as persoas maiores con problemas de mobilidade ou de calquera outro tipo.
Esta argumentación sostíñaa tamén o propio conselleiro de Sanidade, Julio García Comesaña, a semana pasada durante a rolda de prensa de presentación da campaña da gripe. Remarcan ademais que no caso de que non se poida acudir á cita, está planificado desde o principio a vacinación como "repesca" nos centros de saúde de cabeceira, así como nos domicilios nos pacientes inmobilizados. En aproximadamente 15 días chámaselles e vacínaselles no seu centro de saúde ou no seu domicilio no caso de que sexa necesario.
"O obxectivo é vacinar a toda a poboación no menor tempo posible, facilitando todos os dispositivos posibles e sendo flexibles e sensibles a todas as circunstancias persoais e de saúde na poboación", conclúen.
