Histórica vitoria contra os mega eólicos, o Supremo anula definitivamente o gran parque en Ancares-Courel

O Tribunal Supremo anula definitivamente o parque eólico Serra do Iribio (Oribio), paralizado cautelarmente polo TSXG desde 2019, por estar proxectado nunha zona de Rede Natura 2000 e contar cunha informe de impacto ambiental -DIA- obsoleto,  concedida catorce anos antes, en 2005, para un proxecto tramitado baixo a mesma denominación nos mesmos terreos pero substancialmente distinto.

O Alto Tribunal pon fin así aos intentos da Xunta de Galicia por salvar o proxecto promovido por FERGO VENTO SL na Serra do Oribio e dá a razón ás organizacións conservacionistas e ecoloxistas que en 2019 impugnaron a autorización. Xa entón argumentaron que non foi conforme a dereito, xa que a súa construción non era compatible coa conservación da riqueza natural e cultural deste territorio, nin co seu desenvolvemento sustentable, e non cumpría as disposicións do Plano Director da Rede Natura 2000 en Galiza.

 

Nun principio as obras xa foran paralizadas preventivamente polo Tribunal Superior de Xustiza de Galicia (TSXG) en 2019 ao non contar coa documentación regulamentaria. Entón, a empresa promotora e a Xunta presentaron recurso de casación ante o Tribunal Supremo. O proceso conclúe agora cun novo pulo da xustiza á conservación deste espazo natural. O Tribunal Supremo reprocha que a Xunta fixese valer un procedemento de avaliación de impacto ambiental claramente obsoleto, obviando a caducidade da DIA e as sucesivas proteccións legais que se foron outorgando á zona.

 

Segundo informan ADEGA, SGO e FOP trátase dun "gran varapau xudicial para a Xunta de Galicia e a súa política desordenada e insustentable de desenvolvemento eólico". Un feito que chega, ademais poucos días despois de que o TSXG tamén paralizara cautelarmente o parque eólico de Campelo de Greenalia.

 

Esta sentenza dá carpetazo final ao proxecto eólico Serra do Iribio, na ZEC Ancares-Courel, logo de 3 anos desde que se paralizase cautelarmente. Agora, as tres entidades recorrentes solicitarán a correspondente restauración das zonas afectadas polas obras. Esta sentenza é un importante paso para a protección efectiva da exigua Rede Natura en Galicia, salvagardando un dos seus espazos máis emblemáticos. A Serra do Iribio sitúase entre os municipios de Triacastela  e Samos na provincia de Lugo, constituíndo a área máis setentrional do espazo natural do Courel e con presenza do oso pardo.

 

FIXA XURISPRUDENCIA

 

As entidades ecoloxistas din que é "relevante" que o Tribunal Supremo realizou o esforzo de fixar xurisprudencia sobre a caducidade das declaracións de impacto ambiental. "Trátase, por tanto, dun pronunciamento que vai máis aló do caso particular de Iribio  e que pode resultar determinante para moitos outros supostos tamén fóra do territorio galego, ao interpretar a normativa estatal", indican.

 

Ademais, esta doutrina afecta non só a parques eólicos, senón a calquera tipo de proxecto sometido a avaliación de impacto ambiental no que a Administración, obviando os prazos de caducidade que impón a normativa, outorgue autorización.