A Xunta prevé aumentar un 8,5% os investimentos nos orzamentos de 2023 en plena crise

Os orzamentos da Xunta para o ano que vén prevén un incremento do 8,5% dos investimentos, ata superar os 2.700 millóns de euros, segundo avanzou este venres o conselleiro de Facenda, Miguel Corgos. Adiantouno en declaracións aos xornalistas despois de reunirse co presidente da confederación de empresarios de Galicia (CEG), Juan Vieites, quen valorou este incremento: "Quereriamos máis pero tal e como está o mundo é moi positivo", dixo.

Previamente, Corgos viuse cos representantes dos sindicatos CIG, UGT e CC.OO., cos que unicamente abordou o dato concreto do teito de gasto, xa coñecido e que ascende a 12.599 millóns. Corgos ratificou que o proxecto de contas públicas verá luz verde a semana que vén nunha reunión do Consello e despois entrará no Parlamento.

E concretou que os máis de 2.700 millóns de euros en investimentos repártense entre o capítulo 6, de gastos de capital (que crece un 9,3%) e o capítulo 7, de transferencias de capital (que sobe un 8%).

Son uns orzamentos que "teñen que responder á realidade económica complicada" que vive Galicia, debido, entre outras cuestións, á crise de prezos pola guerra de Ucraína, xustificou.

Así, o conselleiro asegurou que irán dirixidos a "paliar" a suba de prezos que afecta as familias e "dar certezas para saír deste momento".

Ademais, no relativo ao gasto social, comprometeu que será un "compoñente moi importante" nas contas para o próximo exercicio.

Por último, referiuse ao "alivio fiscal" para as familias, con novas rebaixas de impostos "especialmente ás rendas máis modestas". Neste ámbito, o proxecto recolle por unha banda a deflactación do tramo autonómico do imposto sobre a renda das persoas físicas (IRPF) con efecto retroactivo desde o 1 de xaneiro de 2022 e por outro a rebaixa do primeiro tramo autonómico do IRPF do 9,4% ao 9%.

"Esta é a cuarta rebaixa do IRPF en nove anos para favorecer as rendas medias e baixas, polo que os cidadáns galegos aforrarán na declaración de 2023 unha media de 476 euros en relación co que pagaban en 2009", subliña a consellería nun comunicado.

Pola súa banda, o dirixente da patronal galega, Juan Vieites, valorou este "alivio fiscal" ás familias, e dixo que as contas "van apostar pola competitividade" tamén das empresas.

Neste sentido, destacou que a Xunta está "a tentar" acometer rebaixas fiscais que "sexan adecuadas para que todo o mundo poida ter diñeiro nos petos".