O PP defende que o Sergas trata de cubrir "da mellor maneira posible" a carencia de pediatras
Así responde ás críticas dos grupos da oposición ás declaracións do xerente do Sergas nas que dixo que "a poboación ten que entender que non poderá haber un pediatra en cada centro de saúde".
Por Europa Press / Redacción | SANTIAGO DE COMPOSTELA | 17/10/2022 | Actualizada ás 14:24
O portavoz parlamentario do PPdeG, Pedro Puy, defendeu este luns a implicación da Xunta en materia de sanidade e explicou que o Sergas trata de cubrir "da mellor maneira posible" a carencia de pediatras, unha especialidade con "déficit" en España.
Así respondeu, a preguntas dos medios, ás críticas dos grupos da oposición ás declaracións do xerente do Sergas nunha entrevista a La Voz de Galicia, onde dixo que "a poboación ten que entender que non poderá haber un pediatra en cada centro de saúde". Sobre a situación da pediatría, Pedro Puy explicou que é "complicado cubrir" as prazas polo "problema de déficit de pediatras" a nivel estatal, o que se une á "baixa natalidade" en determinadas áreas e centros de saúde, o que fai que algúns postos non conten cun volume de traballo que "cubra expectativas".
No entanto, a consellería "é consciente" deste problema e "está a tentar cubrir da mellor maneira posible" as necesidades, dixo Puy, que apostou por ter en conta modelos como os que hai noutros países europeos, nos que as crianzas son atendidas por médico e enfermeira de primaria cando non existe especialista.
En canto á situación global da atención primaria, Puy destacou que está a pasar "por un momento complicado" que "require actuacións conxuntas, de máis dunha administración, e non só da Xunta". No caso de Galicia, destacou, tomáronse "medidas importantes", como a adxudicación por concurso de méritos de prazas de difícil cobertura.
