Un incendio sen feridos nun tren Feve en Narón corta a circulación

O incendio dun tren da liña de ancho métrico, antiga Feve, que cubría o traxecto entre Ferrol e San Sadurniño, á altura da estación de Santa Icía, en Narón, motivou que a circulación de trens quedase cortada.

Na zona desprazáronse efectivos do Servizo de Protección, Extinción de Incendios e Salvamento de Narón, cuxos profesionais se encargaron de sufocar as chamas. Tamén acudiron ao lugar axentes da Policía Local de Narón e Policía Nacional. Todos os pasaxeiros puideron abandonar o convoi e ningún resultou ferido.

As chamas producíronse despois de que un dos depósitos de combustible sufrise unha rotura e tras a caída deste sobre pezas mecánicas que alcanzan unha gran temperatura.