Profesionais da tradución outorgan o Premio Xela Arias á Mesa pola Normalización Lingüística
O xurado valora o seu labor na iniciativa de cambio da nova Lei Xeral do Audiovisual para conseguir que o galego teña financiamento anticipado nas producións audiovisuais.
Por Galicia Confidencial | SANTIAGO DE COMPOSTELA | 02/11/2022 | Actualizada ás 11:30
A Asociación Galega de Profesionais da Tradución e da Interpretación vén de resolver por unanimidade outorgar o Premio Xela Arias nesta V edición á Mesa pola Normalización Lingüística "polo seu labor e dedicación na iniciativa de cambio da nova Lei Xeral do Audiovisual para conseguir que o galego teña financiamento anticipado nas producións audiovisuais nas canles e plataformas de televisión lineais ou baixo demanda".
O xurado considerou que esta iniciativa marca un "punto de inflexión" na conquista de dereitos do galego e unha "nova etapa que se está a abrir no ámbito da tradución audiovisual cara ao galego". O acto da entrega do premio celebrarase o 16 de decembro na Coruña.
As gañadoras das pasadas edicións foron a tradutora María Alonso Seisdedos (2018), a Facultade de Filoloxía e Tradución da Universidade de Vigo (2019), o proxecto cooperativo NUMAX (2020) e a revista científica Viceversa (2021).
A AGPTI é unha asociación fundada en 2001 co obxectivo de crear unha plataforma de comunicación entre os e as profesionais da tradución e da interpretación para a defensa do seu colectivo, ademais da difusión da lingua galega como lingua de traballo neste sector.
