O tempo medio de espera para unha cirurxía en Galicia é de 75 días

O Servizo Galego de Saúde (Sergas) atopábase a día 30 de xuño de 2021 como o quinto servizo sanitario autonómico con menor tempo de espera para unha cirurxía, con 75 días de media. Con todo, atópase por encima da media na taxa de pacientes que agarda por unha intervención, con 17,76 habitantes por cada 1.000 (46.553 persoas esperando). En canto á espera para unha consulta co especialista, Galicia atópase de sétima cun tempo medio de 55 días e 75,67 habitantes por cada 1.000.

Son datos publicados este venres polo Sistema Nacional de Saúde (SNS), actualizados ao finalizar o primeiro semestre de 2021, e que reflicten que en toda España a sanidade pública alcanzou o seu máximo histórico de pacientes en lista de espera para unha operación non urxente, con 742.518 persoas. Son ata 81.356 máis que o ano inmediatamente anterior (+10,96 %), pero o tempo medio a nivel estatal era de 113 días, oito menos que un ano atrás.

Doutra banda, que o 17,6 % dos pacientes levaban na lista de espera máis de 6 meses, segundo o últimos datos recolleitos con data do 30 de xuño de 2021. Non entanto, tal e como destaca o Ministerio de Sanidade tras os incrementos experimentados nas primeiras ondas pandémicas, as demoras rexistran unha apreciable diminución respecto da situación previa á pandemia: o tempo medio de espera redúcese en 8 días e a porcentaxe de pacientes que levan en lista de espera máis de seis meses é de 2,3 puntos menor que en decembro de 2019.

Como é habitual a especialidade con maior número de pacientes é Traumatoloxía con 187.404 pacientes en espera; séguelle Oftalmoloxía con 159.218 pacientes. Mentres, a especialidade con menor número de pacientes é Cirurxía Torácica, con 2.355 seguida de Cirurxía Cardíaca con 3.304.

As especialidades con maior tempo medio de espera son Cirurxía Plástica con 226 días e Neurociruxía con 193 días. Mentres, Dermatoloxía con 63 días e Cirurxía Cardíaca con 75 días son as especialidades con menores tempos medios de espera.

Os 11 procesos clínicos que se monitoran especificamente neste sistema de información presentan un tempo medio de espera de 90 días. A demora media rexistrada para as intervencións de cataratas, un dos procesos máis frecuentes, é de 70 días. A cirurxía de hipertrofia benigna de próstata sitúase en 131 días e a operación de hallux valgus ("juanetes") con 122 días.

Hai que sinalar que, con excepción do primeiro ano pandémico, anualmente levan a cabo ao redor de 3,7 millóns de intervencións cirúrxicas nos hospitais do SNS, incluíndo tanto as que se programan en lista de espera como as que levan a cabo con carácter non programable ou urxente.

Neste semestre rexistrouse un maior número tanto de entradas en lista de espera como de saídas por intervención respecto dos dous anos previos, en pandemia, e mesmo un maior número de entradas que no primeiro semestre de 2019, ano previo á pandemia.

En canto ás esperas para primeiras consultas cos diferentes especialistas, estas ven incrementadas respecto dos anos anteriores. Globalmente presentan un tempo medio de espera de 79 días, 4 días máis que o mesmo corte do ano previo.

Traballadores médicos do Sergas. | Fonte: Rosa Veiga