O ministro Planas di que o Goberno traballa para corrixir o veto á pesca de fondo

O ministro de Agricultura, Pesca e Alimentación, Luís Planas, asegurou que o Goberno xa traballa coa Comisión Europea para, a partir do mes de decembro, "corrixir a situación producida" polo veto á pesca de fondo en 87 caladoiros do Océano Atlántico.

Así o sinalou Planas este xoves en Vigo, onde inaugurou a primeira Mesa da Ciencia Pesqueira. Preguntado polos medios de comunicación, o ministro explicou que o recurso a este veto foi presentado polo Executivo central hai dúas semanas, polo que "aínda é cedo" para saber o tempo de tramitación do mesmo.

"Evidentemente, desexo que o prazo sexa o mínimo posible", subliñou, recoñecendo que primeiro terá que ser publicado un resumo do mesmo no diario oficial correspondente. Planas indicou que estivo en contacto cos seus homónimos nos demais estados afectados, como Irlanda, Francia ou Portugal, convidándoos a que se somen á demanda.

Todo iso para axudar a superar esta situación ao conxunto do sector pesqueiro e en particular o palangre de fondo, a arte de pesca máis afectada polo veto. "Estamos a traballar para argumentar de novo en base ao asesoramento científico do Instituto Español de Oceanografía (IEO)", reivindicou, co obxectivo de corrixir unhas medidas "mal deseñadas", postas en marcha con "celeridade" e "improvisación".

"Estamos a traballar en paralelo e cun calendario distinto ao do Tribunal de Xustiza Europeo para tentar, na medida do posible, mitigar e facer desaparecer, se é posible, os efectos negativos sobre a nosa frota", sentenciou Planas, aínda que engadiu que este tema non formará parte da orde do día do próximo Consello de Ministros de Agricultura e Pesca da Unión Europea dos días 11 e 12 de decembro.

(I-D) O delegado Goberno en Galicia, José Manuel Miñones; o alcalde de Vigo, Abel Caballero; o ministro de Agricultura, Pesca e Alimentación, Luís Planas; e a ministra de Ciencia e Innovación, Diana Morant.. Javier Vázquez - Europa Press | Fonte: Europa Press