Omar Montes compara as termas de Ourense cunha paisaxe de Laponia

O cantante Omar Montes visitou este venres as instalacións termais de Outariz (Ourense) con motivo do seu concerto no festival Orbano, na capital ourensá. Durante o baño, comparou as termas cunha paisaxe de Laponia, que visitara no programa Planeta Calleja, e afirmou que son un "privilexio".

En compañía de todo o seu equipo e do alcalde da cidade, Gonzalo Pérez Jácome, o artista chegou ás termas de Outariz con bromas e cancións ao ritmo de palmas para os bañistas. Alí, gozou da auga das pozas co seu grupo de amigos pasándoo, segundo expresou, "como nenos".

Nesta liña, destacou a "sorte" de contar cunha paisaxe como esta e asegurou que Ourense é das cidades "máis bonitas" que coñece.

Durante a súa estancia nas termas, o cantante gravou un vídeo para a rede social 'Tik Tok' en compañía do alcalde, no que declarou entre risas: "Isto é o mellor que me pasou a min despois dos Power Rangers".

Así mesmo, confirmou que está encantado de estar outra vez en Galicia e que tiña moi boas sensacións de cara ao concerto da noite no Pavillón dos Remedios, coas entradas practicamente vendidas na súa totalidade.