México sangra

A imaxe procede dun Nodo gobernamental e produce verdadeiro noxo a quen aínda conserve un pouquiño de dignidade e sentimentos. Os líderes do G20, Peña Nieto entre eles, fan negocios en Australia mentres na pequena aldea de Ayotzinapa, no estado mexicano de Guerreiro, corenta e tres familias choran a desaparición dos seus fillos.

 

Foi o pasado 26 de setembro: a policía e o narcocártel Guerreros Unidos secuestraron 57 estudantes de maxisterio en Iguala. Catro días despois apareceron ilesos 14, pero os 43 restantes seguen desaparecidos. A falta da identificación dos cadáveres, todo indica que foron asasinados e calcinados nun vertedoiro de lixo de Cocula. Na súa procura apareceron nove fosas de asasinatos anteriores: o gobernador de Guerreiro tarda un mes en dimitir, e o frustrado Estado mexicano tarda mes e medio en deter ao presunto indutor do crime, o Alcalde de Iguala, territorio sen lei onde todo é medo e silencio. Terror: 26.000 desaparecidos (recoñecidos polo Goberno federal de México) segundo o último informe de Amnistía Internacional.

 

O asasinato múltiple –“un caso único, de gravidade extrema”, segundo o Grupo de Desaparicións Forzadas da ONU-, conmove ao mundo: cadeas de protestas incendian México, Arxentina, quizais cheguen ás nosas durmidas rúas, aínda que non oímos nin unha soa palabra de condena a Rajoy, tamén de negocios no G20, nin ao seu ministro Margallo, nin a Feijoo, abandeirado da corrupta multinacional mexicana Pemex (non escarallemos “as excelentes relacións bilaterais”, noticia do 6 de outubro); pero si falou o Papa Francisco chamando crime ao crime.

 

Convén que a lei se faga cumprir só en Cataluña, o resto do planeta -de México a Tíbet, pasando por Arxentina, Gaza ou Melilla- pode seguir facendo caixa no G20. Líderes elegantes coas súas guapas esposas que refregan as súas mans bañadas en sangue. @ValentinCarrera