Fuxir da realidade

O dito, anónimo,  viña a confirmar o revolto que estaba o pais francés  diante as protestas estudantís do momento e que trouxeron un cambio importante na sociedade. Pois ben, no primeiro terzo do século 21 xa hai quen pensa que,  diante o que acontece actualmente dende a chegada ó poder do ególatra e narcisista rei sen coroa Trump, o mellor e parar o mundo e baixarse del,  pois todas as normas mundiais que rexían os estados da  aldea global e que eran a guía da humanidade,  caeron ó chan e maiormente non valen pra nada. E como demostración sinalarei casos moi concretos: En Hungría, pais da UE, o seu presidente ignora a Corte Penal Internacional  e recibe ó a Netanyhu, mellor, o que manda que se aniquilen e masacren ós palestinos, ignorando a orde de detención deste tribunal que pesa sobor dese señor. E claro non pasa nada. Nos EE.UU, O presidente  que auspiciou o asalto ó Congreso por non estar dacordo cos resultados electorais  indulta a todos os asaltantes e prende os emigrantes lévandoos encadeados a outro pais americano. En Rusia o ex coronel da KGB, chamado  Vladimir Putin,  encadea os membros da oposición e o principal lider morre de maneira escura nunha cadea do seu pais. E a ristra de novas deste estilo  podería seguir pois é  moito máis longa. Polo que moitos preguntámonos: que está a acontecer no mundo pra que unha serie de principios que eran aceptados pola maioría dos estados saltara polos aires e  quedará en papel mollado?  Polo que, semella que vivimos un tempo no que volvemos a lei do máis forte, e que esta  se vai impondo cada día con máis claridade. Dado que  todas as declaracións universais como a dos dereitos humanos  e os tribunais internacionais xa non vale ren.

 

Na actualidade que nos tocou vivir optar por  fuxir da realidade é moi complicado, pois ademais de tirar ó lixo moitas as normas de convivencia  entre os pobos, estamos a padecer un tempo onde a forza bruta parece mandar no mundo. Cuestión que nos afectará nas normas sociais e como mon  na economía diaria. E diante esta realidade as preguntas saltan e precísanse respostas, pois acaso será posibel que volvamos a unha economía  baseada unicamente  na autarquía?

 

Lembro un artigo que se publicara hai bastantes anos nun xornal e que falaba de que o capitalismo remataría sendo unha guerra de todos contra todos se non había unha serie de normas básicas que se respectaran. Polo que pregunto:  estamos preto de chegar a esa realidade? A caso  volvemos ó imperialismo do século XIX? Ben sei que o mandatario americano  non vai durar sempre no poder, e tamén que a sociedade americana, cos seus defectos, terá que reaccionar e plantarlle cara a este  esaxerado e fantasma  presidente. 

Con tofo o que acontece fuxir da realidade é moi  complicado, pois esta asáltate e, sen comelo nin bebelo, aféctanos a todos. Moitas veces nas miñas reflexións  penso que o mundo ó revés camiña, e faino pois  nesta sociedade estanse a perder  moitos valores éticos que hoxe se botan de menos. Por tal motivo, os gobernantes non poden basear soamente as súas decisións  deixando de lado a parte humana da política, pois do contrario se a economía é soamente o que manda, sempre haberá xustificación pra tentar ter  súbditos e aspirar a ser o rei do mundo como hoxe pretenden Tump e os seus seguidores. En fin, como non podo baixarme do mundo nin vivir ó marxe da realidade que tristemente acontece, espero  e desexo  que as cousas troquen, e que esta xente axiña perciba que vai  polo camiño errado.