O PSdeG chama á sociedade a mobilizarse o 12 de febreiro en Santiago contra "o ataque" do PP ao sistema sanitario

O secretario xeral do PSdeG, Valentín González Formoso, fixo un chamamento á sociedade galega para que participe o próximo 12 de febreiro na manifestación convocada pola Plataforma SOS Sanidade Pública en Santiago de Compostela ante "o ataque" que, segundo dixo, sofre o Servizo Galego de Saúde (Sergas) pola xestión do PP.

O Partido Socialista --igual que o BNG e outros partidos, sindicatos e asociacións-- forma parte desta entidade e este martes Formoso reuniuse co seu portavoz, Manuel Martín, tras o cal ambos compareceron en rolda de prensa.

Martín enmarcou esta protesta do próximo mes nas accións que promove a plataforma "para conseguir que o Parlamento galego debata propostas perfectablente aplicables para frear a deterioración da Atención Primaria, que está en serio risco de desaparición".

Neste sentido, o portavoz de SOS Sanidade Pública lembrou a iniciativa lexislativa popular (ILP) que promoven fronte aos problemas que atravesa o Sergas, entre eles a falta dos "profesionais necesarios para atender a demanda da poboación e para manter abertos PAC e centros de saúde".

Tamén lamentou Martín que, por parte da Administración galega, neste 2023 o incremento do orzamento en Atención Primaria é "ínfimo", á parte de que, ao seu xuízo, "non hai un plan específico para a reposición e o incremento" de profesionais nos centros de saúde.

Nesta mesma liña, o secretario xeral do PSdeG puxo o foco en que esta situación provoca que "están a ocorrer cousas que nunca antes ocorreran no sistema público galego", entre elas listas de espera en Atención Primaria con "entre cinco e dez días de atraso" para unha consulta "que ademais non é persoal, senón que é a través dunha liña telefónica".

A isto sumou Formoso que os servizos de urxencias están "abarrotados", cuns corredores cheos de camas nos que "hai xente que espera ata unha semana para ter unha habitación hospital"; e que os traballadores teñen un "nivel de desestabilización laboral enorme, moi por enriba do resto de sanitarios españois".

Neste contexto, o líder socialista considera que a sociedade galega "debe mobilizarse", porque "está en risco claramente o sistema sanitario galego" que o PPdeG pretende "desmantelar".

"Fago un chamamento claro da sociedade galega a que, ante o ataque ao sistema sanitario público, temos que estar a apoiar aos sanitarios e estando presentes nas rúas o día 12 lanzando un berro de axuda, de reclamación de que por aí non imos pasar", sentenciou Valentín González Formoso.