O PPdeG estrea un podcast para presentar de "xeito informal" aos candidatos municipais
'En Primeira Persoa' realizará entrevistas aos candidatos.
Por E.P. | SANTIAGO DE COMPOSTELA | 15/02/2023 | Actualizada ás 15:51
O PPdeG estreará este xoves nas súas redes sociais un programa de podcast que levará por título 'en Primeira Persoa' no que diferentes candidatos do catro provincias galegas serán entrevistados, destaca a formación, "nun formato directo, dinámico, e adaptado ás novas formas de comunicación que ofrece o universo transmedia".
"Os nosos candidatos sempre escoitan aos seus veciños e agora chegou o momento de que os veciños poidan escoitar ao seu candidato", expoñen os populares como máxima. Este produto audiovisual estará dispoñible tanto en formato vídeo en 'Youtube' como en audio a través da plataforma 'iVoox', e o seu contido será adaptado aos diferentes formatos das redes sociais coas que xa conta o partido, ás que proximamente se unirá tamén 'TikTok'.
NICO MONTES, ASPIRANTE EN TUI, PRIMEIRO ENTREVISTADO
O primeiro episodio desta serie de podcast emitirase este xoves á primeira hora da mañá e, nesta ocasión, o entrevistado será Nico Montes, candidato do PP á Alcaldía de Tui.
Durante as seguintes semanas, cada martes e xoves, outros candidatos someteranse a este particular cuestionario que busca que a cidadanía vexa aos seus políticos "de maneira informal, como persoas próximas, como amigos, máis aló de discursos e ideoloxías. En definitiva: "coñecer á persoa que hai detrás do político".
