O PSdeG reivindica o traballo de Cegasal para empregar ás persoas con discapacidade: "Normaliza unha necesidade"
"Dá unha oportunidade a quen máis o necesita, que é quen máis dificultades de inserción laboral ten", di Formoso
Por E.P. | SANTIAGO DE COMPOSTELA | 22/02/2023 | Actualizada ás 15:04
O secretario xeral do PSdeG, Valentín González Formoso, destacou o traballo da entidade Cegasal, que emprega a persoas con discapacidade, xa que "dá unha oportunidade a quen máis o necesita, que é quen máis dificultades de inserción laboral ten".
Na súa visita a un centro da entidade situado no Polígono Industrial do Tambre en Santiago, Formoso puntualizou que esta entidade "emprega en Galicia a máis de 2.000 persoas de forma directa" e subliñou que "normaliza unha necesidade".
Deste xeito, explicou que lugares como o da visita, creado nos anos 90 e onde se recuperan vehículos tendo en conta factores ambientais, indican que é unha entidade que "sabe ler as oportunidades de futuro".
Pola súa banda, o presidente de Cegasal, José Antonio Vázquez Freirr, explicou que son unha iniciativa social sen ánimo de lucro e que os beneficios "se reinvisten na empresa, en tecnoloxía e en formación, para xerar emprego".
Nesta liña, indicou que Cegasal está a levar a cabo "un proxecto europeo que vai supor un antes e un despois para as persoas con discapacidade mental en Galicia". Así, destacou o traballo do Concello de Santiago "que cumpre coa lei neste ámbito".
