Sete cociñeiros competirán por ser o "rei das tapas" de Galicia
De Tapas por Galicia elixe mañá ao mellor cociñeiro de petiscos galegos nunha competición con sete profesionais representando a sete cidades
Por Galicia Confidencial | Santiago de Compostela | 20/03/2023 | Actualizada ás 17:23
Sete petiscos, sete cociñeiros e sete cidades. De Tapas por Galicia 2023 poñerá mañá a competir a sete cociñeiros das principais cidades galegas para promocionar o turismo urbano e a súa oferta gastronómica.
Os finalistas son: Sheila Martínez do restaurante Roots (A Coruña); Álex M. Bacelo e Mar Lago do Bacelo (Ferrol); Beatriz Alcalá de La Zapatería del abuelo (Ourense); Ana Vilar da Cervexaría Leria (Vigo); Rubén González de El Cafetín de la Alameda (Pontevedra); Álvaro Villasante do Paprica (Lugo) e Álvaro Pérez de ArteSana Gastrobar (Santiago de Compostela).
Cada chef disporá dun máximo de sete minutos para rematar a súa etapa no escenario. Entre as propostas atópanse algunhas como "Gyoza de chocos na súa tinta", "Bocado de aldea", "Canta castaña" ou "Vacalao: do crú ao cociñao".
Os sete cociñeiros disputaranse dous galardóns ante un xurado profesional e integrado por Roberto Filgueira, Martá Fernández, Laura García del Valle, Lola Crespo ou Cesáreo González. Valorarán cada petisco segundo a complexidade técnica, a creatividade, a presentación e o sabor.
Por outra banda estará o premio do xurado popular, que se elixirá mediante un sistema de televotación. Os dous gañadores faranse con un trofeo acreditativo e un vale de ata 500 euros para gastar en restaurantes do Grupo Nove.
