'Sendas de Santiago': oito rutas naturais para "atraer" o turismo familiar e de natureza
Pretenden ofrecer unha alternativa para "descentralizar" os fluxos turísticos do centro histórico
Por Europa Press / Redacción | Santiago de Compostela | 21/03/2023 | Actualizada ás 15:21
O Concello de Santiago presentou, baixo o nome de 'Sendas de Santiago', un catálogo composto por oito rutas naturais de "fácil percorrido" e accesibles desde o centro, entre as que se atopan as rutas dos ríos Sar e Sarela ou a ascensión ao monte Pedroso, e co que pretende atraer ao "turismo familiar e de natureza".
O concelleiro de Turismo de Santiago, Sindo Guinarte, acompañado da xerente de Turismo, Flavia Ramil, presentou este martes este proxecto, co que o goberno municipal desexa mostrar a "excelente" relación existente entre o núcleo urbano de Compostela e a súa contorna.
O responsable de turismo declarou que esta estratexia turística, que pretende pór en valor o patrimonio natural do termo municipal, ten un "dobre obxectivo". Por unha banda, ofrecer unha alternativa que permita "descentralizar" os fluxos turísticos que se concentran no centro histórico, e por outra, dirixirse ao "turismo de natureza e ao turismo familiar".
Neste sentido, destacou que as oito sendas naturais son accesibles a pé desde o centro da cidade, de curta e media duración e pouca ou ningunha dificultade, polo que están orientadas tanto a familias con pequenos, mascotas ou persoas con mobilidade reducida, como a "cicloturistas ou senderistas máis avanzados".
MÁIS DE 80 METROS CADRADOS "VERDES" POR HABITANTE
Así mesmo, Guinarte destacou os "espazos verdes" de Santiago de Compostela, entre os que se inclúen parques, xardíns, hortas, ríos e paisaxes, que se complementan coas zonas rurais de cada unha das parroquias polas que pasan as sendas.
Neste sentido, Guinarte destacou que Santiago "está moi por enriba das recomendacións da Organización Mundial da Saúde (OMS), de 10 ou 15 metros de zonas verdes por cidadán.
O oito sendas naturais que conforman o catálogo son as seguintes: Río Sarela Arriba; Río Sarela Abaixo; Finca do Espiño, Selva Negra e Granxa do Xesto; Monte Pedroso; Río Sar, Muíño de Parceiros; Río Sar, Bosque do Banquete de Conxo; Bosque de Galicia, Cidade da Cultura, Parque do Lago; e Monte Viso.
