O Colexio de Podólogos imparte un curso de formación gratuíto sobre as patoloxías das unllas
Alerxias por contacto con pinturas, alteracións por uso de zapatos de tacón ou traumatismos son algunhas das máis frecuentes
Por Galicia Confidencial | Galicia | 24/03/2023 | Actualizada ás 11:57
O Colexio de Podólogos de Galicia celebra mañá un curso gratuíto sobre "Patoloxía clínico-quirúrxica da unlla: Casos clínicos" ao que asistirán máis de 40 podólogos na sede de Santiago de Compostela.
A formación estará impartida polo doutor especialista en dermatoloxía, Jesús María García. O obxectivo é dar formación sobre enfermidades das unllas dos pés desde o punto de vista da dermatoloxía con casos clínicos reais.
"As enfermidades máis frecuentes das unllas dos pés son a onicomicose, a unlla encarnada e os trastornos causados por traumatismos e o calzado", indicou o especialista. O doutor explica tamén que o tratamento quirúrxico é necesario en moitos procesos, principalmente nos tumores benévolos e prexudiciais.
García Silva sinala que é o perfil dos pacientes é variado, sendo os mozos os máis propensos ás "unllas encarnadas" e alteracións causadas pola práctica deportiva. Mentres, nos maiores predominan as onicomicose e os trastornos causados pola insuficiencia arterial. Tamén nas mulleres predominan as alerxias de contacto por pinturas de unllas e alteracións polo uso de zapatos con tacóns altos e puntas estreitas.
