DO presenta un novo candidato en Barbadás, tras renunciar a edila que tiña desde 2015

Democracia Ourensana (DO), partido que preside o alcalde de Ourense, Gonzalo Pérez Jácome, presentou a Daniel Rey como cabeza de lista para o municipio de Barbadás de cara ás eleccións municipais do 28 de maio.

Fina Varela, que desde 2015 leva como concelleira neste Concello, comunicou o pasado mes de decembro a Jácome que non repetiría como candidata "por motivos persoais", segundo informa a formación.

Daniel Rey, destaca DO, é "ben coñecido" polos veciños de Barbadás polo seu "enorme labor de décadas de bo facer" como membro de protección Civil. Ademais, preséntase cunha "completa" e "nova" candidatura "con moitas ganas de cambiar e mellorar" o municipio.

O presidente de Democracia Ourensana, Gonzalo Pérez Jácome, presenta a Daniel Rey como candidato en Barbadás nas próximas eleccións municipais do 28 de maio | Fonte: DO