Puy afirma que "non é exemplar" a condución de Baltar pero di que "xa deu explicacións"

O portavoz parlamentario de PPdeG, Pedro Puy, recoñeceu que "non é exemplar" conducir a 215 quilómetros/hora pola autovía, como fixo o presidente da Deputación de Ourense, Manuel Baltar, a bordo do coche oficial da institución provincial o pasado domingo 23 de abril e polo que xa foi sancionado pola vía administrativa e citado en xuízo rápido o 9 de maio.

"Estamos a favor de que os cargos públicos sexan exemplares", manifestou, a preguntas dos xornalistas este martes, o portavoz parlamentario do PPdeG, quen agregou, á pregunta de se é exemplar conducir a 215 km/h que non o é. "Non é exemplar conducir a 215 km/h", contestou, para engadir que "iso require unha sanción", a cal xa foi abonada --segundo confirmou o propio Baltar--.

Con todo, remitiu ás explicacións dadas no pleno da Deputación de Ourense o pasado venres 28 de abril --nas que admitiu outras dúas multas por exceso de velocidade e un total de dez ao coche oficial da institución--. Pola súa banda, os grupos da oposición no Parlamento de Galicia introducisen senllas cuestións pola vía de urxencia para a seguinte sesión plenaria, a última antes de que arrinque a campaña electoral e das municipais do 28 de maio.

Así, destacou que "deu cumprida resposta" ás cuestións que introduciron PSOE e BNG e tamén lembrou que "pediu desculpas". "Evidentemente é claro que non é exemplar conducir a 215 km/h", sentenciou.

PSOE PREGUNTA URXENTE

Así as cousas, o portavoz do Grupo Socialista, Luís Álvarez, manifestou que levarán esta cuestión ante as "escusas" presentadas polo presidente da Deputación máis propias coma se estivese a pilotar un avión alegando que "perdeu as referencias espaciais".

Álvarez, que lembrou que é a mesma recta pola que circulan o resto de persoas que transitan a A-52, indicou que o seu grupo preguntará pola "permanencia" no cargo dunha persoa cuxos comportamentos son "inaceptables" para un cargo público, que "está obrigado a ter un comportamento exemplar" en todo os ámbitos, dixo.

Nesta liña, a viceportavoz do BNG na Cámara, Olalla Rodil, chamou a atención sobre a "gravidade" de que Baltar fose "cazado a 215 km/h e a golpe de domingo" e por iso preguntará sobre que consecuencias deben pesar sobre un cargo público sobre o que debe pesar a "exemplaridade", na "vida pública e privada".

Rodil concluíu que non houbo ningunha consecuencia porque "manda máis Baltar que Rueda". "Non fai nada porque non ten capacidade nin poder político para esixirlle", manifestou, para sinalar que hai "ocultación" sobre os feitos ocorridos. A deputada nacionalista esixiu información sobre un acontecemento que é "un delito contra a seguridade viaria".