Galicia supera a media nacional en matronas por número de mulleres en idade fértil

O Consello Xeral de Enfermaría (CGE) advertiu de que a desigualdade no número de matronas (enfermeiras especialistas en Obstetricia e Xinecoloxía) entre comunidades autónomas "pon en risco a saúde reprodutiva e sexual de miles de mulleres en idade fértil". Neste índice, Galicia sitúase por encima da media nacional.

Segundo as últimas cifras publicadas polo Instituto Nacional de Estatística (INE), existe unha enorme diferenza entre a cidade autónoma de Melilla, con 151,86 matronas por cada 100.000 mulleres en idade fértil, ou o País Vasco, con 132,08 matronas, e Asturias, con 41,76, ou Canarias, con 24,5. Estes datos están moi afastados tamén entre si da media española (75,1).

Á cola por número de matronas por cada 100.000 mulleres en idade fértil están Cataluña (59,49), Andalucía (61,37) e Comunidade Valenciana (72,13). Xa dentro da media atópanse Castela-A Mancha (77,91) e Murcia (79,57). Estremadura (80,91), Baleares (82,15) e Madrid (86,74) xa están por encima da media nacional. Por arriba da lista, e tras Melilla e País Vasco, sitúanse Navarra (123,75), Castela e León (111,90), Cantabria (108,35), Aragón (101,48), Ceuta (97,14) e Galicia (91,18).

"Unha diferenza enorme entre zonas que supón un retroceso nos coidados das mulleres daquelas comunidades cun menor número de matronas, así como unha sobrecarga de traballo das profesionais, que, despois de tres anos de pandemia, atópanse exhaustas", lamentou o CGE a través dun comunicado.

Imaxe de arquivo dunhas enfermeiras traballando con máscaras.. SATSE