Un xulgado denega retirar as publicacións de La Voz cos audios de Jácome

Oxulgado de instrución número 1 de Ourense denegou as medidas cautelares demandadas polo alcalde de Ourense, Gonzalo Pérez Jácome, que esixía a retirada das publicacións do diario La Región e La Voz de Galicia que recollen os audios nos que o rexedor ourensán comenta con varios interlocutores supostas prácticas irregulares vinculadas a concesións do goberno local e ao financiamento do seu partido.

O maxistrado do xulgado ourensán en funcións de garda rexeita as pretensións de Jácome ao entender que non achegou "o máis mínimo indicio que permita afirmar, neste momento procesual, que os audios publicados ata a data polo diario denunciado teñan unha procedencia ilícita", segundo recolle a resolución difundida polo TSXG este sábado.

O alcalde e líder de Democracia Ourensá reclamaba a retirada da edición electrónica e impresa dos contidos do diario, a prohibición da difusión por calquera vía de calquera material que recollese as gravacións e a entrega no xulgado dos orixinais e "todas as copias" dos audios revelados ao entender que foran obtidos de forma ilegal co obxectivo de causar dano á súa persoa.

Jácome tamén presentou unha denuncia similar contra o xornal La Región, que publicou o groso dos audios que recollen conversacións do alcalde con asesores que apuntan a posibles irregularidades cometidas desde o goberno local e no financiamento de Democracia Ourensá. Fontes xudiciais consultadas por Europa Press trasladaron que aínda non hai decisión do xulgado sobre esta denuncia.

Así as cousas, o xuíz considera que a existencia de "unha mera sospeita" non é "en absoluto" suficiente como para adoptar unha medida cautelar que supoña a limitación dun dereito fundamental como o do acceso á información.

O alcalde de Ourense, Gonzalo Pérez Jácome, durante unha rolda de prensa | Fonte: Agostime - Europa Press