Podemos Galicia quere estar en Sumar pero di que a decisión depende de Madrid
Di que o adianto electoral impide que poidan realizarse unhas primarias para confeccionar as listas como reclamaba Podemos.
Por Europa Press / Redacción | SANTIAGO DE COMPOSTELA | 03/06/2023 | Actualizada ás 15:50
O coordinador de Podemos Galicia, Borja San Ramón, reiterou que a organización morada galega é favorable a confluír con Sumar, o partido creado pola vicepresidenta Yolanda Díaz, e así configurar unha "candidatura ampla", aínda que recoñeceu que a decisión final corresponde á dirección estatal que encabeza a secretaria xeral, Ione Belarra.
San Ramón atendeu aos medios de comunicación antes da celebración do Consello Cidadán Autonómico na sede de Podemos Galicia en Santiago, que serviu para analizar os resultados das eleccións municipais do pasado 28 de maio e dar os primeiros pasos para preparar as xerais convocadas para o 23 de xullo.
Segundo o responsable autonómico de Podemos, o resultado do 28 de maio é "malo, sen paliativos" en todo o Estado e require de "un proceso de reflexión e traballo conxunto" para analizar as causas, aínda que admitiu que a celebración das xerais en sete semanas fai que non poida tomarse "moito tempo". "Témonos que pór a camiñar", dixo.
Neste sentido, a preguntas dos xornalistas, San Ramón incidiu en que a postura da dirección que asumiu, con el á fronte, as rendas de Podemos Galicia a finais de 2022 é "evidente" sobre a súa relación co proxecto de Yolanda Díaz, á que o documento co que concorreron ás eleccións internas recoñecía un liderado no espazo político que ven compatible co orgánico que exerce Ione Belarra.
Con todo, matizou que a decisión final sobre a confluencia con Sumar corresponde á dirección estatal que encabeza a tamén ministra Ione Belarra, con quen San Ramón mantivo unha conversación "esta semana" na que lle trasladou que a postura de Podemos Galicia "é pública e evidente".
Preguntado pola posibilidade de que sexa necesario de que algunhas referencias do partido teñan que dar un paso a un lado para que exista o acordo, San Ramón incidiu en que "non lle consta" que exista esa petición "a nivel público" e apelou a que a configuración das listas é un traballo que corresponde facer "a Díaz e o seu equipo con Podemos, Esquerda Unida, os 'comúns', Compromís, Máis Madrid e as decenas de forzas" que forman parte do "espazo político".
Neste sentido, apuntou que o adianto electoral impide que poidan realizarse unhas primarias para confeccionar as listas como reclamaba Podemos porque esta forma de democracia interna está "no ADN" da organización.
