Jácome xoga con atrasar a investidura por un expediente da Xunta Electoral Central
O motivo é a falta de acordo en 62 votos do barrio de Covadonga que a Xunta Electoral Central debe decidir se pertencen a Ciudadanos ou a Democracia Ourensana.
Por Europa Press / Redacción | OURENSE | 15/06/2023 | Actualizada ás 14:22
O alcalde en funcións de Ourense, Gonzalo Pérez Jácome, ofreceu esta mañá unha rolda de prensa na que anunciou que "hai altas posibilidades" de que a investidura, prevista para este 17 de xuño, finalmente se atrase por un expediente da Xunta Electoral Central.
"Hai unha posibilidade moi alta, case llo digo seguro, de que eu non sexa alcalde de Ourense este sábado", introduciu o rexedor en funcións, aclarando que se debe a que previsiblemente a investidura sexa atrasada.
O motivo é a falta de acordo en 62 votos do barrio de Covadonga que a Xunta Electoral Central debe decidir se pertencen a Ciudadanos ou a Democracia Ourensana, despois de que esta formación, que lidera Pérez Jácome e que foi a máis votada en Ourense, presentase un escrito ante a Xunta Electoral de Ourense, o pasado tres de xuño, para reclamar esas papeletas.
Jácome presentou dita reclamación tras un reconto do escrutinio ao considerar que "parece evidente" que se produciu "un erro de transcrición" á hora de realizar as anotacións entre dúas actas dunha mesa en Covadonga, "acta de sesión versus acta escrutinio", "intercambiando" os votos entre a partidos Democracia Ourensana e Ciudadanos.
O líder de Democracia Ourensana solicitaba que os votos se computasen para a súa formación "para evitar unha anomalía estatística de imposible credibilidade", asegurando que o seu partido foi o máis votado en mesas e seccións próximas a ese distrito onde Ciudadanos non obtivo votos.
Nunha primeira instancia o escrito presentado por DO foi rexeitado pola Xunta Electoral de Ourense, ao entender que "debe prevalecer o que dispón a acta de sección onde consta que foi o partido Cidadáns o que tivo 62 votos" e que "foi validado polos interventores", pero a situación pasou a mans da Xunta Electoral Central.
"Posiblemente se teña que atrasar a sesión de investidura debido a eses 62 votos roubados en Eiroás, porque se está debatendo que pasará e nós somos como o exército americano: ningún home atrás", sostivo Jácome respecto diso desta situación, manifestando que "loitarán" por esas papeletas e sinalando que "se trata dun tema xurídico polo que hai que esperar".
Así concluíu que o sábado "podería ser a investidura, pero hai un 60 0 70% de posibilidades de que se teña que aprazar".
