A Xunta premia un ano máis as mellores mensaxes de amor en galego co certame 'Lingua de Namorar'
Por E.P. | SANTIAGO DE COMPOSTELA | 19/06/2023 | Actualizada ás 18:07
O secretario xeral de Política Lingüística, Valentín García, e a directora xeral de Xuventude, Cristina Pichel, participaron este luns no acto de entrega dos premios aos gañadores da duodécima edición de 'Lingua de Namorar', o certame en liña impulsado pola Xunta que promove a creación de mensaxes de amor en galego entre os mozos.
O representante da Consellería de Cultura deu o parabén aos gañadores e animounos "a continuar empregando o galego para relacionarse coas persoas máis próximas e para comunicarse na rede".
A Xunta, engadiu, "traballa, xunto con outras entidades galegas, no Proxecto Nós, que está destinado a fornecer de ferramentas que permitan interactuar coa tecnoloxía en galego ao mesmo nivel que nas linguas do mundo con maior número de falantes".
Pola súa banda, a representante da Consellería de Política Social destacou que esta nova edición de 'Lingua de Namorar' puxo de manifesto, unha vez máis, "que Galicia ten unha mocidade talentosa e creativa".
Na primeira categoría de idade (categoría A, de 14 a 19 anos), recolleu o seu galardón a pantonesa Carla López Otero, terceiro premio pola declaración de amor titulada 'Translúcidas chinesas'. Non puideron asistir para recoller o segundo e o primeiro premio, respectivamente, o coruñés Santiago Sánchez Vilariño, galardoado pola mensaxe 'Distancia', e a ourensá Alba Guzmán, premiada pola súa mensaxe 'Chover ten que chover'.
Doutra banda, na categoría B (de 20 a 35 anos) recibiron os seus galardóns a lalinense Eva González Branco, primeiro premio pola mensaxe 'Áncora'; Clara Pérez Martínez, da Bola, segundo premio pola composición 'Morriñada', e Andrea López Otero, de Pantón, terceiro premio polo poema 'Entre as cinzas'.
INSTAGRAM
Na modalidade de Instagram, que abarca dos 14 aos 35 anos, a mensaxe mellor valorado na rede social entre o seis preseleccionados polo xurado foi '#Aartedoboquerer', da ourensá Iria Cebreiros Trigo, que recibiu tamén unha tablet, así como un lote de libros e un diploma.
Tanto as mensaxes gañadoras como as finalistas pode consultarse no Portal da Lingua Galega e na páxina web de Xuventude, así como nos Instagram de @XuventudeGalicia e @LinguaGalega.
