A Xunta reclámalle ao Goberno "explicacións" de por que o Corredor Atlántico Noroeste non terá fondos da UE
A Consellería de Infraestruturas relacionao coa "a falta de apoio, a falta de compromiso e a falta de implicación" do Executivo estatal co Corredor Atlántico Noroeste, que é "esencial" para a competitividade de Galicia.
Por E.P. | SANTIAGO DE COMPOSTELA | 22/06/2023 | Actualizada ás 20:41
A Consellería de Infraestruturas e Mobilidade da Xunta pide "unha explicación" ao Goberno de España sobre por que o Corredor Atlántico Noroeste non figura entre os proxectos que se beneficiarán das axudas da Comisión Europea para impulsar a rede comunitaria de transportes.
Do total de 6.200 millóns anunciados este xoves, haberá 247 millóns para proxectos en España como a 'Y vasca' e a conexión do Corredor Atlántico con Francia ou tramos do Corredor Mediterráneo, pero na listaxe de iniciativas seleccionadas non figura ningún do noroeste español.
A través dun comunicado, a Xunta considérao "unha pésima noticia" que confirma os seus "temores". De feito, a Consellería de Infraestruturas relacionao coa "a falta de apoio, a falta de compromiso e a falta de implicación" do Executivo estatal co Corredor Atlántico Noroeste, que é "esencial" para a competitividade de Galicia.
O departamento que dirixe Ethel Vázquez insta o Goberno de España, e máis concretamente ao comisionado que nomeou para o Corredor Atlántico, José Antonio Sebastián, a "explicar por que" ningún proxecto do noroeste vai recibir fondos europeos nesta convocatoria.
É máis, a Xunta di que non ten "interlocución" co Goberno, polo que non sabe se é que España "non presentou ningún proxecto galego e do noroeste á actual convocatoria", ou se é que aquel que presentou non ten "a calidade suficiente" para ser seleccionado.
"O único que sabemos é que a UE vai destinar este ano 6.300 millóns de euros a impulsar a rede europea de transportes, dos cales 250 serán para España pero ningún para Galicia nin para o noroeste. E iso merece, como mínimo, unha explicación", conclúe a Consellería neste comunicado.
