Feijóo calado ante Trump: "Non son dos que o insulta nin son cómplice dalgunhas das súas decisións"
"Non son dos que chama ao señor Zelensky por teléfono para apoialo e o que máis compra gas ruso", di.
Por Europa Press / Redacción | SANTIAGO DE COMPOSTELA | 15/02/2025 | Actualizada ás 16:26
O presidente do PP, Alberto Núñez Feijóo, volveu a insistir este sábado en que el non é "como o PSOE ou como Vox" respecto das súas relacións co presidente de Estados Unidos, Donald Trump, e defendeu que "nin insulta" nin é "cómplice dalgunhas das súas decisións" que, engadiu, non comparte.
"Eu non vou ser nin dos que faltan ao respecto aos presidentes dos países democráticos, nin dos que calan cando os nosos sectores produtivos están risco", subliñou na súa intervención no acto de conmemoración do primeiro aniversario de Alfonso Rueda como presidente da Xunta tras as eleccións autonómicas de 2024.
Nesta liña, manifestou que tampouco é "dos que chama ao señor Zelensky por teléfono para apoialo" e, á vez, "o que máis compra gas ruso". Por iso, sinalou que vai defender " sempre as relacións internacionais de España baixo os principios de respecto e de equilibrio".
"Defenderei sempre os intereses do meu país. Defenderei sempre os intereses dos nosos traballadores, dos agricultores e de gandeiros, e de todo o sector industrial e do conxunto de sectores produtivos", reivindicou antes de aseverar que "nunca" terá unha "política exterior" para defender os seus "intereses persoais".
