Estas son as estacións de tren de Galicia que contarán con atención remota de Renfe
Facilitará a información e compra de billetes
Por E.P. | SANTIAGO DE COMPOSTELA | 28/06/2023 | Actualizada ás 15:02
Renfe comezou a instalar unha nova canle de atención ao cliente de forma remota nun total de 13 estacións que actualmente non contan con persoal en Galicia. En concreto, contarán con estes servizos as estacións de: A Rúa, O Barco de Valdeorras, Sarria, O Carballiño, Ribadavia, Guillarei, Redondela. Tamén nas estacións de trens de ancho métrico: Xuvia e Pedroso, en Narón; Ortigueira; Viveiro; Burela e Ribadeo.
O servizo, a través de atención persoal en remoto, facilitará a información e compra de billetes. As máquinas, que xa se están colocando en estacións e estarán instaladas progresivamente durante este ano, permitirán, unha vez entren en funcionamento, que os clientes se comuniquen con persoal para obter información ou xestionar os seus billetes. A previsión é instalalas progresivamente durante 2023 nun total de 154 estacións de toda España. Renfe investiu neste proxecto un total de 13 millóns de euros.
ACCESIBILIDADE
O sistema ARES (Atención Remota en Estacións) é unha solución tecnolóxica para facilitar o servizo de atención e venda de billetes aos clientes que utilizan as estacións da denominada "España baleirada". Os axentes físicos están situados nun 'contact center' que, a través das pantallas dos terminais, interactúan cos usuarios.
Permite unha relación de persoa a persoa a través dunha pantalla, o que facilitará a comunicación durante todo o horario de servizo da estación, informa a compañía a través dun comunicado.
A información poderase solicitar de forma verbal ou por escrito, segundo elixa o cliente, e permitirá que con tan só achegarse á estación, o cliente poida facer as súas xestións de venda, postventa, consulta e atención ao cliente. O sistema, ademais, é accesible: os terminais certificáronse baixo a normativa de accesibilidade coa obtención do certificado DVI.
O cliente só terá que tocar a pantalla das máquinas en estacións para contactar directamente cun operador, que lle atenderá de forma persoal en remoto. O axente de Renfe ofrecerá a información e facilitará a compra de billetes, coa posibilidade de que o cliente poida imprimir o seu título de transporte in situ, ademais de consultar as súas dúbidas.
