O Goberno presume dun "máximo histórico" de policías e gardas civís en Galicia

Galicia camiña cara os 9.000 axentes de Policía Nacional e Garda Civil, "a maior cifra de efectivos das forzas e corpos de seguridade do Estado da historia", segundo a Delegación do Goberno en Galicia. Unha cifra a que se chega logo da incorporación ás súas comisarías ou cuarteis, durante estes días de  verán, das últimas promocións de axentes que superaron o proceso de  formación inicial nas academias de cada corpo.

En total son 8.858 efectivos. Trátase dunha cifra superior á rexistrada a finais de 2011, 

data que ata o de agora marcaba o máximo de efectivos policiais en Galicia. Desde ese ano, o persoal de Policía Nacional e de Garda Civil experimentou un acusado proceso de redución que levou a que, en  decembro de 2017, ambos os dous corpos sumasen 8.214 efectivos. Polo tanto, a cifra deste verán superará en 644 os  efectivos de hai cinco anos, cun crecemento do 7,8%.

O aumento de persoal de Policía Nacional e Garda Civil foi posible grazas ás cinco ofertas de emprego público sucesivas convocadas por iniciativa conxunta do Ministerio de Facenda e Función Pública e do Ministerio do Interior, todas elas con taxas de reposición superiores 

ao cen por cento. A nivel estatal, a cifra de efectivos tamén alcanza o máximo histórico de 156.400 policías nacionais e gardas civís, tal e como anunciou o ministro do Interior, Fernando Grande-Marlaska.

OPERACIÓN VERÁN

Moitas das incorporacións de novos e novas policías nacionais e gardas civís nestas vindeiras semanas permitirán reforzar o dispositivo  policial da Operación Verán, que arrinca  este vindeiro 1 de xullo e que estará vixente en Galicia ata o 31 de agosto. Un total de 3.642 

efectivos policiais dedicaranse a esta operación, que prestará unha  atención especial ás cidades, ás zonas turísticas, ás festas e ao  Camiño de Santiago. Deste total, 2.021 efectivos pertencen á Garda Civil e 1.622, ao Corpo Nacional de Policía.

No caso da Garda Civil, destaca a vixilancia do Camiño de Santiago, co funcionamento, un ano máis, das Oficinas Móbiles de Atención ao  Peregrino (OMAP), así como o papel da Agrupación de Tráfico no apoio  ás operacións especiais deseñadas pola Dirección Xeral de Tráfico para mellorar a seguridade viaria nos desprazamentos destas datas. A  Policía Nacional centrará a súa actividade nas cidades e na atención a  persoas peregrinas no ámbito da súa demarcación, como é o caso da  cidade de Santiago.