Prisión para o mozo que agrediu a un xornalista en Pontevedra e que agredira tamén a Rajoy
O Xulgado de Instrución número tres de Pontevedra decretou o ingreso en prisión provisional comunicada e sen fianza do mozo de 25 anos que agrediu a un xornalista de La Voz de Galicia en Pontevedra.
Por Europa Press / Redacción | PONTEVEDRA | 15/07/2023 | Actualizada ás 20:15
O Xulgado de Instrución número tres de Pontevedra decretou o ingreso en prisión provisional comunicada e sen fianza do mozo de 25 anos que agrediu a un xornalista de La Voz de Galicia en Pontevedra.
Segundo informou o Tribunal Superior de Xustiza de Galicia (TSXG), o mozo pasou a disposición do xulgado, que decretou o seu ingreso en prisión investigado polos delitos de homicidio en grao de tentativa, atentado a axentes da autoridade, danos e lesións.
En concreto, trátase do mesmo home que en decembro do ano 2015 agrediu ao entón presidente do Goberno, o popular Mariano Rajoy, nunha rúa en Pontevedra.
Segundo publicou 'La Voz de Galicia', entrou na redacción e atacou cun coitelo ao xornalista Alfredo López Penide, que sufriu feridas nunha man e no peito.
O autor da agresión irrompeu na redacción que o xornal ten na rúa Rosalía de Castro na mañá do venres, onde, conforme indicou La Voz de Galicia, empezou a golpear cun rodete ordenadores e outros efectos das instalacións. No lugar estaba, ademais do xornalista agredido, unha persoa de administración.
Tras ser alertada, a policía reduciu ao agresor, que presentou resistencia. Unha vez detido, foi trasladado á Unidade de Psiquiatría do CHOP.
AGRESIÓN A MARIANO RAJOY
O arrestado, que agora ten 25 anos, agrediu en decembro de 2015 ao entón presidente do Goberno, Mariano Rajoy, ao que se achegou para pedirlle unha foto mentres paseaba polo centro de Pontevedra con motivo da campaña electoral. Por iso, foi condenado polo xulgado de menores de Pontevedra a dous anos de internamento en réxime pechado como autor dun delito de atentado.
Ademais, no ano 2019 foi arrestado por golpear a un dirixente de Vox e, no 2020, a Policía Nacional detívoo por agredir a un cliente nun bar de Ourense. Por estes feitos foi xulgado esta semana, aceptando a condena pactada polas partes.
Este sábado, a Asociación da Prensa da Coruña manifestou a súa preocupación polas condicións nas que desenvolven o seu traballo a diario os xornalistas. "A agresión sufrida por un compañeiro da delegación de La Voz de Galicia en Pontevedra pon de manifesto a necesidade de revisar as medidas de seguridade coas que contan as redaccións", sinalou a entidade nun comunicado.
