O PSdeG esixe á Xunta unha "investigación inmediata" polas supostas filtracións de inspeccións a centros de maiores

A secretaria de Políticas Sociais da Comisión Executiva Nacional Galega do PSdeG, Marga Martín, esixiu este sábado á Xunta de Galicia que abra unha "investigación inmediata" sobre as supostas filtracións das datas nas que se realizarían inspeccións, realizadas desde a Consellería de Política Social ás empresas que xestionan os centros de maiores.

Os socialistas fanse eco así do comunicado realizado por AGISS (Asociación Galega de Inspectores e Inspectoras de Servizos Sociais) denunciando estes supostos feitos, que a Xunta de Galicia negou. "Trátase dunhas acusacións moi graves que carecen de absoluta veracidade e que, ademais, a pesar da súa gravidade fanse sen ningún tipo de proba. Isto é así porque non a hai, xa que as afirmacións que aparecen no documento son completamente falsas", asegurou a Consellería de Política Social.

O departamento indica que "evidentemente, non se dá ningún tipo de aviso á dirección dos centros", algo que, apunta, "corrobórao o feito de que se seguen interpondo expedientes sancionadores cando se atopan cuestións que non están acorde á normativa". "Se houbese avisos non se producirían sancións", insiste.

Así, a socialista advertiu de que de confirmarse o obxecto da denuncia sería "un feito gravísimo", polo que demanda que "se poñan todos os medios necesarios para que se chegue ata o final e se aclare radicalmente o que pasa". "A gravidade do sucedido radica en que é o Goberno galego o que ten a responsabilidade de velar pola seguridade, a saúde e o benestar dos maiores, especialmente dos máis vulnerables, é o que debe garantir o bo funcionamento destes centros residenciais", sinalou.

Advertiu ademais de que "xa non é a primeira vez que se denuncian feitos parecidos". "Cando se produciron as investigacións pertinentes sobre o funcionamento das residencias durante a pandemia de Covid, a Xunta púxose de lado das empresas e non dos residentes e as súas familias", indicou.

No comunicado denuncian tamén a situación da dependencia en Galicia, especialmente destes centros de maiores. A este respecto, Marga Martín destacou que segundo un informe da Asociación de Directoras e xerentes de Xeriátricos de 2021 que analiza datos do IMSERSO, a comunidade autónoma ten a peor porcentaxe en canto a prazas públicas, o 41 % respecto do 62 % do conxunto do Estado.

Ademais, a deputada electa apuntou que unha gran parte das consideradas como prazas públicas están xestionadas por empresas privadas mediante diversos mecanismos de privatización. Así, o PSdeG rexistrou iniciativas parlamentarias para "aclarar os feitos" e "esixir a asunción das correspondentes responsabilidades", sen descartar "que non se poidan abordar outras vías de actuación máis aló das meramente institucionais" de confirmarse os feitos denunciados.

Varios anciáns nunha das salas da Residencia de maiores de Carballo | Fonte: M. Dylan