Lores cre que "non ten sentido" negociar co PSOE porque "non queren entrar a gobernar"
O PSOE negou publicamente que esta decisión estivese xa tomada.
Por E.P. | SANTIAGO DE COMPOSTELA | 14/08/2023 | Actualizada ás 15:34
O alcalde de Pontevedra, Miguel Anxo Fernández Lores, cre que os socialistas "non queren entrar a gobernar" no Concello de Pontevedra, unha postura que valorou como "válida e respectable como calquera outra".
Nunha comparecencia de prensa celebrada este luns, o alcalde de Pontevedra, do BNG, fixo referencia ás negociacións dun posible pacto de goberno e asegurou que os nacionalistas saben "que o PSOE xa ten decidido non entrar", así pois considera que, mentres non cambie esa decisión, "non ten sentido" negociar.
O rexedor nacionalista entende que "os feitos producidos nos últimos tempos", tamén durante o último ano de mandato e durante a campaña electoral, corroboran esta renuncia a formar un goberno coaligado, aínda que o Partido Socialista negou publicamente que esta decisión estivese xa tomada.
Neste contexto, Lores tendeu a man ao PSOE: "Cando cambien de decisión, sentarémonos a falar e poderemos chegar a un acordo rapidamente para facer o mellor goberno de coalición posible, mentres tanto nós seguimos traballando".
DECISIÓN "POLÍTICA"
O alcalde de Pontevedra entende que agora existe unha decisión "política" do PSdeG de non entrar no Goberno, como tampouco quixo entrar en Santiago de Compostela, onde goberna a nacionalista Goretti Sanmartín, tamén en minoría.
Igualmente, Lores quixo "agradecer expresamente" ao PSOE que o apoiase para a investidura para que "seguise sendo alcalde", pois non estaría no cargo sen o voto socialista. E é que o PP de Rafa Domínguez foi a lista máis votada, pero sen maioría absoluta.
NON É UNHA SITUACIÓN INÉDITA
Sobre esta nova etapa cun equipo do Bloque de nove concelleiros, Lores lembrou que xa gobernaron sen maioría no pasado e nos seus 24 anos e sete mandatos como alcalde xa ten experiencia con todo tipo de gobernos, en solitario e en coalición, con maioría e en minoría.
"Nós xa gobernamos nesta cidade con dez e con ata sete concelleiros", lembrou Lores, que recalcou que o BNG ten "moi decidido" o que quere para esta cidade: "Un modelo de vangarda pensado para as persoas", e a única alternativa que existe a iso, engadiu, "é a moción de censura, e iso pasa por que se poñan de acordo o PP e o PSOE".
"Eu non quero iso, evidentemente, pero tampouco se pode aspirar a que cambiemos de liña de deseño de cidade", concluíu.
