O PSOE dos Blancos celebra que aparten dun órgano de goberno ao edil condenado por violencia doméstica

O alcalde dos Blancos, José Manuel Castro Blanco, apartou como representante municipal no consello escolar a José Manuel Barreiro Jardón, que foi condenado por violencia doméstica ao seu pai, un cesamento que desvelou o PSOE e que este partido celebrou.

De feito, asegura que grazas ao seu "traballo" e á denuncia pública feita polo PSOE nos últimos días, o rexedor decidiu "recular" e retirar a esta persoa deste órgano de goberno.

Os socialistas aplauden a decisión, pero lamentan que "nunca se debeu chegar a esta situación, xa que esta persoa nunca debeu ser nomeada nun órgano de goberno municipal".

Neste sentido, o PSOE lembra que no seu día denunciou a presenza desta persoa nas listas do PP, que alegou que descoñecía que aínda pesaba sobre el unha pena accesoria. No seu momento, os populares dixeron que non o incluirían no goberno, pero o PSOE lamenta que "non cumprisen coa súa palabra".

"Estamos ante un día moi importante para o noso municipio e os seus veciños, xa que por fin vemos cumprida a promesa de que Barreiro Jardón non formará parte do goberno municipal nin dos respectivos órganos de xestión", sinalou a portavoz socialista nos Blancos, Emilia López Branco.

Con esta rectificación e o cesamento, danse "por cumpridos os principios éticos e morais polos que debe rexerse unha corporación municipal", sostivo a edila, que espera que se manteña esta situación ata fin de mandato e non haxa "sorpresas" no futuro.

Casa do Concello dos Blancos (Ourense) | Fonte: Elisardojm en Wikipedia.