Unha vintena de especialistas analizarán en Lourenzá a pegada de Fernández del Riego na cultura galega

Ao redor dunha vintena de especialistas de diferentes institucións reuniranse en Lourenzá, vila natal do homenaxeado de 2023 polo Día das Letras Galegas, Francisco Fernández del Riego, para analizar a súa pegada na cultura galega do século XX. Entre o luns 4 de setembro e o mércores 6, estudarán a biografía e a obra do homenaxeado como activista, intelectural, estudioso e escritor nos sucesivos contextos históricos que percorreu na súa case centenaria vida.

A Real Academia Galega, a Universidade de Santiago de Compostela e o Concello de Lourenzá colaboran na organización da cita, que forma parte da oferta de cursos de verán da USC. As xornadas contan ademais co apoio económico da Deputación de Lugo, o Ministerio de Ciencia, Innovación e Universidades e a Xunta de Galicia.

O académico e catedrático da USC Henrique Monteagudo dirixe as xornadas, que poderán seguirse en directo a través da páxina web da Real Academia Galega. A institución publicará posteriormente os traballos presentados neste marco no seu Boletín. O presidente da Academia inaugurará o foro cunha conferencia sobre Francisco Fernández del Riego nesta institución. O homenaxeado estivo vinculado a ela desde 1948, primeiro como académico correspondente e logo, a partir de 1960, como numerario.

Unha das súas primeiras iniciativas como tal foi propor a creación do Día das Letras Galegas que, 60 anos despois da primeira edición dedicada a Rosalía de Castro, agora el mesmo protagoniza. A xornada inaugural continuará cun relatorio biográfico de María Dolores Villanueva Gesteira, autora de Francisco Fernández del Riego, un loitador pola idea de Galicia (Galaxia, 2023) e colaboradora fundamental de don Paco nos seus últimos tres anos de vida.

O programa do martes arrincará cun relatorio do historiador Justo Beramendi sobre os anos de formación política e intelectual de Del Riego e seguirá coa mesa redonda 'Da República á resistencia', co académico Lourenzo Fernández Prieto, profesor da Universidade da Coruña Uxío Breogán Diéguez e o investigador do Instituto da Lingua Galega Pablo García Martínez.

A mañá finalizará cunha conferencia do director da Sección de Historia da RAG e catedrático emérito da USC, Ramón Villares Paz, sobre a relación do homenaxeado coa diáspora galega en América, coa que "tendeu constantemente pontes durante a ditadura". Neste terreo profundará durante a tarde do día 5 de setembro o académico Jesús Alonso Montero nunha intervención centrada no epistolario entre Del Riego e o artista e intelectual Luís Seone. A xornada do martes acabará cun percorrido didáctico polos lugares de Del Riego en Lourenzá, guiado polos seus biógrafos locais, Manuel Román e Xosé López González.

ACTIVIDADE EPISTOLAR

A intensa actividade epistolar de Fernández del Riego será tamén foco de atención xa na xornada do mércores 6 de setembro, na que se analizará pormenorizadamente o valor das cartas que intercambiou con Álvaro Cunqueiro, Ricardo Carballo Calero, e o filólogo portugués Manuel Rodrigues Lapa e Ramón Otero Pedrayo.

Será nunha mesa que contará coas achegas da profesora da USC Dolores Vilavedra, Henrique Monteagudo e a secretaria da Fundación Otero Pedrayo, Patricia Arias Chachero, encargada da edición do epistolario entre don Paco e o de Trasalba que publicará proximamente a Real Academia Galega.

A relación entre memoria, ensaio e paisaxe na obra de Del Riego será o eixo da seguinte mesa redonda, na que tomarán a palabra a académica de número María López Sández, a catedrática emérita da Universidade de Vigo Camiño Noia, o académico correspondente Ramón Nicolás e o director da Fundación Penzol, Xosé Manuel Soutullo.

A xornada de clausura finalizará cunha terceira mesa redonda sobre Francisco Fernández del Riego na xeración Galaxia, coas contribucións do profesor de Filosofía da USC Xosé Luís Pastoriza, o investigador do ILG e secretario do curso de verán, Álex Alonso Nogueira, e o catedrático da Universidade de Vigo Xosé Manuel Dasilva.

Francisco Fernández del Riego | Fonte: RAG