O presidente da Deputación de Pontevedra acusa ao PSOE de oposición "rocambolesca"
Di que aínda están en "shock" polos resultados das municipais.
Por E.P. | PONTEVEDRA | 22/09/2023 | Actualizada ás 12:59
O presidente da Deputación de Pontevedra, Luis López, manifestou que "a desorientación que ten o PSOE motivada pola súa derrota electoral" nas municipais do 28 de maio, nas que perdeu o control da institución provincial, "é cada vez máis rocambolesca".
Así o manifestou en relación á denuncia do portavoz socialista na Deputación, Carlos Font, dun "galopante proceso de baltarización" na administración provincial. A preguntas dos xornalistas nunha comparecencia celebrada este venres en Pontevedra, Luis López sinalou que no PSdeG-PSOE "ou se ten mala memoria ou os datos téñenos mal", cando o partido da oposición reprocha a actuación do actual goberno en materia de recursos humanos.
O presidente da Deputación lembrou que o proceso de funcionarización de 79 prazas do persoal laboral aprobouno o anterior bipartito (PSdeG e BNG) e en canto aos postos de persoal eventual "temos os mesmos que tiñan eles, 18, pero coa excepción de que nós só temos cubertos 12".
Para Luis López, unha "crítica tan dura" como a feita polo Partido Socialista "só pode ser resultado dese 'shock' no que aínda están" e engadiu que "xa pasaron dous meses pero aínda non se dan recuperado"."Pontevedra, por desgraza, aínda non ten unha oposición á altura dos pontevedreses", lamentou Luís López.
