A colleita da pataca atrásase pola choiva pero espérase unha calidade "excelente"
A producción reduciuse un 20% polas treboadas de primavera
Por Europa Press / Redacción | SANTIAGO DE COMPOSTELA | 23/09/2023 | Actualizada ás 11:22
A colleita da pataca este ano acumula uns días de atraso debido ás choivas, mentres a demanda, que chega tamén de países do exterior máis aló de Portugal, mantén prezos que a indicación xeográfica protexida (IXP) estima que se situarán entre os 0,40 e os 0,60 euros por quilo.
En declaracións a Europa Press, o presidente do consello regulador da indicación Pataca de Galicia, José Manuel Gómez, indica que as precipitacións destas xornadas non afectarán á calidade do produto, que é "excelente", cuns calibres medios que o mercado "acepta moi ben", pois non se trata dunha pataca "grandota nin pequeniña". De feito, o tamaño fíxao entre 40-50 e pico e 70 milímetros, "moi apto para o consumo".
Nunha campaña que define como "un tanto atípica", os produtores esperaban que fose "un pouco máis complicada" do que está a resultar, debido aos problemas de sementeiras tardías, afectadas o exceso de auga das treboadas de maio e xuño.
Así, a pataca sufriu "moitos problemas de enfermidades", incrementadas por ese exceso de humidade, o que obrigou a dar "máis tratamento do normal" e levou uns custos de produción superiores á media doutras campañas.
Agora que a colleita está "a arrincar", Gómez constata que "a cousa se vai animando de prezos" e sitúa en valores máis altos, ao redor de 0,80 euros o quilo, o que se pagará polo produto en zonas como Bergantiños e A Mariña de Lugo, con producións máis pequenas e mercados de proximidade.
"BASTANTE PARALIZADO"
Desde a comarca da Limia, Amador Díaz, de Patacas Ama, constata que a campaña está "bastante paralizada" debido ás choivas. El mesmo tentou ir dous días a unha leira e tivo que deixalo "ás dúas horas".
En todo caso, a recolección adoita empezar sobre o día 20 de setembro, apunta consultado por Europa Press, e as precipitacións por si mesmas "non son malas, porque baixa a temperatura e isto en principio vai permitir unha boa almacenaxe".
Díaz percibe "gran demanda" sobre todo da variedade agre, de países como Bélxica, "que non é o normal". E é que o habitual é que a pataca da IXP dedíquese ao consumo nacional e a Portugal.
Á espera de "coñecer máis" sobre as magnitudes deste ano cando paren as choivas, os produtores prevén unha caída do 20% polas treboadas de primavera que estragaron algunhas leiras.
